هەرێم نیوز
دۆناڵد ترەمپ ڕایگەیاند، ئێران لە پشت هێرشی حووسییەكان بۆ سەر كەشتییە ئەمریكییەكان وەستاوە.

ئەمڕۆ دووشەممە 17ی 3ی 2025، دۆناڵد ترەمپ، سەرۆكی ویلایەتە یەكگرتووەكانی ئەمریكا، ڕایگەیاند: ئێران لە پشت هێرشی حووسییەكان بۆ سەر كەشتییە ئەمریكییەكان وەستاوە، هەر هێرشێكی نوێ ئێران ئاراستەی دەكات و وەڵامێكی بەهێزمان دەبێ.

ترەمپ لە تویتێكدا لە تۆڕی كۆمەڵایەتیی (تروس سۆشیال) دەڵێ: "پێویست ناكات كەس فێڵمان لێبكات، سەدان هێرشی حووسییەكان لەلایەن ڕێگر و بەڵتەچییە توندڕۆكانی یەمەنەوە دەكرێن، ئەوانە كە گەلی یەمەنیش ڕقی لێیانە، هەموویان سەرچاوەكەیان ئێرانە و ئەو دروستی كردوون."

ئەوەشی خستەڕوو: "هەرهێرشێك یان كاردانەوەیەكی دیكە لە حووسییەكانەوە بكرێ، ڕووبەڕووی هێزێكی زۆر دەبنەوە، هیچ گرەنتییش نییە ئەو هێرشە لەو ئاستەدا بوەستێت."
دەشڵێ: ئێران هاوكاریی حوسییەكان بە چەك و پارە و كەرەستەی سەربازی دەكات، تەنانەت لەڕووی زانیاریی هەواڵگریشەوە هاوكارییان دەكات.

ئاماژەی بەوەشکرد: "هەر گولەیەك حووسییەكان بیتەقێنن، ئەو گولەیە لەلایەن چەك و فەرماندەكانی ئێران تەقێنراوە، ئەوەش ئاكامی زۆر خراپی دەبێ."

لەم هەفتەیەدا پێكدادانی حووسییەكان بۆ كەشتییە ئەمریكییەكان و هێرشی ئاسمانیی ئەمریكا بۆ سەر حووسییەكانی یەمەن چڕ بووەتەوە، بەوەش 53 چەكداری حووسی كوژراون.