هەرێم نیوز

حەوت ڕۆژ بەسەر ڕێککەوتنی ئاگربەستی غەززە تێ دەپەڕێت، کە لە قۆناغی یەکەمدا حەماس، سێ بارمتەی ئیسرائیلی ئازاد کرد، لەبەرانبەردا ئیسرائیل 90 دیلی فەڵەستینی ئازاد کرد، بڕیاریشە ئەمڕۆ قۆناغی دووەمی ئاڵوگۆڕی گیراوانی فەڵەستینی و بارمتەکانی ئیسرائیلی دەست پێ بکات.

بزوتنەوەی حەماس، ڕۆژی هەینی ناوی چوار ژنە بارمتەی ئیسرائیلی ڕاگەیاند، کە بڕیارە ئەمڕۆ شەممە لە بەرامبەر ئازادکردنی زیندانیانی فەلەستینی لە ئاڵوگۆڕی دوەمدا و لە چوارچێوەی ڕێککەوتنی ئاگربەست لە کەرتی غەززە ئازاد بکرێن.

بزوتنەوەکە ئاماژەی بەوەشکردوە، ئەو بارمتانەی کە ئەمڕۆ ئازاد دەکرێن بریتین لە کارینا ئاریف تەمەن 20 ساڵان، دانیێلا گیلبۆای تەمەن 20 ساڵان، نەعما لیڤی  تەمەن 20 ساڵان و لیری ئێلباگ تەمەن 19 ساڵان.

بەگوێرەی ڕێککەوتنی ئاگربەست، ئیسرائیل 200 زیندانی یان دەستگیرکراوی فەلەستینی لە بەرامبەر ئەو چوار بارمتەدا ئازاد دەکات، کە 120 چالاکوانی فەلەستینی سزای هەتاهەتایییان بەسەردا سەپێنراوە، دوای ئەوەی بە تۆمەتی دەستپێکردنی "هێرشی خوێناوی" سزا دراون.

سەرچاوە فەرمییەکانی ئیسرائیل بۆ کەناڵی 12ـی عیبری ڕایانگەیاند، بارمتەکانی ئیسرائیل کە لە کەرتی غەززە دەستگیر کراون، لە کاتژمێر 12ـی نیوەڕۆ تا 2ـی پاشنیوەڕۆ ئازاد دەکرێن.

ئەمەش لە کاتێکدایە، یەکشەممەی ڕابردوو، ئاگربەستەکەی غەززە بە نێوەندگیریی میسر و قەتەر و ئەمریکا، کەوتە واری جێبەجێکردنەوە، لە قۆناغی یەکەمدا کە ماوەکەی 42 ڕۆژ دەبێت، دانوستانەکان بەردەوام دەبن بۆ دەستپێکردنی قۆناغی دووەم و دواتر قۆناغی سێیەم.