هەرێم نیوز
بەڕێوەبەری کاروباری مین لە سلێمانی ڕایگەیاند، ئێوارەی ئەمڕۆ مینێک بە شوانکارەیەکی خەڵکی چوارقوڕنەدا تەقیوەتەوە و گیانی لەدەستداوە.
موحسین کەریم بەڕێوەبەری کاروباری مین لە سلێمانی لە لێدوانێکدا ڕایگەیاند، ئێوارەی ئەمڕۆ یەکشەممە 17.11.2024 لە سنووری چەمی یاڵە سەر بە ناحیەی زەلال، مینێک بە شوانکارەیەکی خەڵکی چوارقوڕنەدا تەقیوەتەوە و گیانی لەدەستداوە.
ئاشکراشیکرد، شوانکارەكە تەمەنی 16 ساڵ بووە و لە کاتی لەوەڕاندنی ئاژەڵەکانی مین پێیدا تەقیوەتەوە.
ئەوەشی خستەڕوو، ئەمانە زانیاری سەرەتایین دەستیان کەوتووە و تا ئێستا نازانرێت ئەو شوێنە کێڵگەی مین بووە یان شوانکارەکە دەستکاری مینی کردووە و پێیدا تەقیوەتەوە.
باسی لەوەشکرد، بۆ ئەو مەبەستەش سبەی دووشەممە 18.11.2024 تیمێکی بەڕێوەبەرایەتیی کاروباری مینی سلێمانی دەچێتە شوێنەکە و لێکۆڵینەوە لە رووداوەکە دەکەن.