هەرێم نیوز
وەزارەتی پێشمەرگە لە بڵاوکراوەیەکدا ڕایدەگەیەنێت، ئه‌مڕۆ لە سنوری خورماتوو، بۆمبێکی چێندراو بە کاروانی ئۆتۆمبیلەکانی فەرماندەی فەوجی 3ی لیوای 1ی هاوبەشی پێشمەرگە و سوپای عێراق تەقییەوە و له ئه‌نجامدا سێ پێشمەرگە شه‌هیدبون و ڕوداوەکەش لە ئەنجامی کێوماڵکردنی ناوچەیەکی بەرفراوانی ئاسایشی هاوبەش بوە.
وەزارەتی پێشمەرگە رایگەیاند: ئەمڕۆ یەکشەممە، 17ی تشرینی دووەمی 2024 کاتژمێر 9 لە سنوری خورماتوو، بۆمبێکی چێندراو بە کاروانی ئۆتۆمبیلەکانی فەرماندەی فەوجی3ی لیوای 3ی هاوبەشی پێشمەرگە و سوپای عێراق تەقیەوە، لەئەنجامدا عقید روکن سامان سابر سلێمان فەرماندەی فەوج و عقید محمد رەزا کریم ئەفسەری ئەندازەی فیرقەی 9ی سوپای عێراق و ن.ض شریف احمد محمدٲمین شەهید بون، هەروەها سێ سەربازیش برینداربوون.
ئاماژە بەوەشدراوە، ڕووداوەکە، لە ئەنجامی کێوماڵکردنی ناوچەیەکی بەرفراوانی ئاسایشی هاوبەش بووە.
وەزارەتی پێشمەرگە راشگەیاند: "بەم بۆنە خەمناکەوە، پرسەو سەرخۆشی لەخۆمان و کەس و کارو هەفاڵ و هاوسەنگەرانیان دەکەین لە یەزدانی مەزن داواکارین سەبر و ئارامی بە ئێمە و ماڵبات و کەس و کارییان ببەخشێت."