هەرێم نیوز
وتەبێژی کۆمسیۆنی عێراق رایگەیاند، دوای بڵاوكردنەوەی ئەنجامی كۆتایی هەڵبژاردەكانی پەرلەمانی كوردستان، بۆماوەی سێ ڕۆژ دەرگای تانەدان لە ئەنجامەكان دەكرێتەوە، دواتر ئەنجومەنی كۆمیسیاران بڕیار لەسەر تانەكان دەدات و پاش كۆتایی هاتنی ئەو بابەتە دەبێت لەماوەی 10 ڕۆژدا پەرلەمانی كوردستان كۆ ببێتەوە.
جومانە غەلای، وتەبێژی كۆمیسیۆنی باڵای سەر بەخۆی هەڵبژاردنەكانی عێراق ڕایگەیاند: دوای ئەوەی ئەمڕۆ ئەنجامی كۆتایی هەڵبژاردنەكان ڕاگەیەندرا، لە سبەینێوە بۆ ماوەی سێ ڕۆژ لایەنە سیاسییەكان و كاندیدەكان دەتوانن تانە لە ئەنجامەكان بدەن، پاشان ئەنجومەنی كۆمیسیاران بڕیار لەسەر تانەكان دەدات.
ئاماژەی بەوەشكرد، دوای یەكلاكردنەوەی تانەكان لەلایەن ئەنجومەنی كۆمیسیارانەوە، ئەوكات ناوە دەرچووەكان بۆ پەرلەماندەنێردرێن بۆ سەرۆكایەتی هەرێمی كوردستان و پاشان لەماوەی 10 ڕۆژدا سەرۆكایەتی هەرێم داوای یەكەم دانیشتنی خولی شەشەمی پەرلەمانی كوردستان دەكات بۆ ئەوەی پەرلەمانتارەكان سوێندی یاسایی بخۆن و یەكەم دانیشتن بكرێت.
بەپێی یاسای ژمارە یەكی پەرلەمانی كوردستان كە لە ساڵی 1992 دەرچووە، لە یەكەم دانیشتنی پەرلەماندا، سەرەتا بەتەمەنترین پەرلەمانتار سەرۆكایەتی دانیشتنەكە دەكات.