هەرێم نیوز
سەرچاوەیەکی بەرپرس لە ڕاوێژکاریی ئاسایشی نیشتمانیی عێراق ڕایگەیاند که لە کۆبوونەوە ئەمنییەکانی نێوان عێراق و ئێراندا بە هیچ شێوەیەک باس لە دەرکردن یان ڕادەستکردنی ئۆپۆزسیۆنی ئێران نەکراوە.
ئەمڕۆ سێشەممە، 20ـی تشرینی یەکەمی 2026، سەرچاوەیەکی بەرپرس ئاشکرای کرد که قسەکردن لەسەر بوونی ڕێککەوتنی عێراق و ئێران بۆ ڕادەستکردنی ئەندامانی ئۆپۆزسیۆنی ئێران بە دەسەڵاتدارانی تاران، سەرتاپا ناڕاستە و هیچ بڕیارێکی عێراقیش نییە بۆ دەرکردنی ئەو گرووپە سیاسییە ئۆپۆزسیۆنانە لە وڵات، و ئاماژەی بەوەش دا که ئەو گرووپانە بەپێی یاسا نێودەوڵەتییەکان ئامادەن و پابەندن بە یاساکانی عێراقەوە.
ئەم لێدوانە لە وەڵامی نووسینێکی محەمەد کاظم ئال سادق، باڵیۆزی ئێران لە عێراقدا دێت که لە تۆڕی کۆمەڵایەتیی «ئێکس» بڵاوی کردبووەوە کە ئێران و عێراق ڕێککەوتوون لەسەر دەرکردنی ئۆپۆزسیۆنی کوردیی ئێران لە هەرێمی کوردستان یان ڕادەستکردنەوەیان بە تاران.
جێگەی باسە، پێشتریش دەزگای ڕاوێژکاریی ئاسایشی نیشتمانیی عێراق لە ڕاگەیەندراوەکەیدا لەبارەی کۆبوونەوەی بەرپرسانی ئەمنیی عێراق و ئێران،، هیچ ئاماژەیەکی بە ڕێککەوتنێکی لەو شێوەیە نەکردبوو.