هەرێم نیوز
فەرماندەیی ناوەندیی هێزەکانی ئەمریکا (سێنتکۆم) ڕایگەیاند کە سەرەڕای پەلامارە بەردەوامەکانی تاران، گەرووی هورمز بە کراوەیی لەبەردەم هاتوچۆی کەشتییە بازرگانییەکاندا ماوەتەوە و گەمارۆی دەریایی سەپێنراو بەسەر ئێراندا بە تەواوی جێبەجێ دەکرێت.
براد کووپەر، فەرماندەی سێنتکۆم لە پەیامێکی ڤیدیۆییدا ڕوونی کردەوە کە ویلایەتە یەکگرتووەکانی ئەمریکا بە هەماهەنگی لەگەڵ هاوبەشە هەرێمییەکانی کۆنترۆڵی گەرووەکەیان کردووە؛ بە شێوەیەک تەنها لە ماوەی حەوت ڕۆژی ڕابردوودا نزیکەی ٤٠٠ کەشتیی بازرگانی بە سەلامەتی بە گەرووەکەدا تێپەڕیون و یارمەتیی هاوپەیمانان دراوە بۆ گواستنەوەی زیاتر لە ١٠٠ ملیۆن بەرمیل نەوتی خاو.
ئاماژەی بەوەش کرد کە هێزەکانیان بەردەوامن لە پووچەڵکردنەوەی مینە دەریاییەکان و پاراستنی کەشتیگەلی نەوتهەڵگر.
فەرماندەی سێنتکۆم، سوپای پاسدارانی ئێرانی بە ئەنجامدانی هێرش بۆ سەر کەشتییە مەدەنییەکان تۆمەتبار کرد و ئاشکرای کرد کە بەپێی ئاماری ڕێکخراوی دەریایی نێودەوڵەتی، لە مانگی شوباتەوە تا ئێستا زیاتر لە ٢٠ دەریاوانی مەدەنی لە ئەنجامی پەلامارەکانی ئێراندا گیانیان لەدەستداوە.
لە ڕووی ئابوورییشەوە، کووپەر جەختی کردەوە کە ڕێکارە سەربازی و دەریاییەکانی ئەمریکا ڕێگرییان لە هەناردەکردنی نەوتی خاوی ئێران بە بەهای لانی کەم ٢٥ ملیار دۆلار کردووە، هاوکات دەست بەسەر ٣٥٠ ملیۆن دۆلار سەرمایەی دراوی دیجیتاڵیدا گیراوە.
بە گوتەی کووپەر، ئەم گەمارۆیە وێڕای هەڵمەتە سەربازییە ٣٨ ڕۆژییەکەی پێشوو کە بنکەکانی مووشەکی بالیستی و درۆن و هێزی دەریایی ئێرانی پێکرابوو، گورزێکی قورسی لە ژێرخانی ئەمنیی سوپای پاسداران داوە؛ بە شێوەیەک توانای تارانی بۆ دابینکردنی بودجەی گرووپە چەکدارەکانی کەم کردووەتەوە و کێشەی نەدانی مووچە و شایستە داراییەکانی لە کەرتی نەوت، پیشەسازی و هێزە ئەمنییەکانی ناوخۆی ئێراندا دروست کردووە.
لە کۆتاییشدا ئاماژەی دا کە زیاتر لە ٥٠ هەزار سەربازی ئەمریکی لە ڕۆژهەڵاتی ناوەڕاستدا لە ئەرکدان بۆ بەرپەرچدانەوەی هەر جموجووڵێکی تاران و پاراستنی ئاسایشی دەریایی.