هەرێم نیوز
لە کاتێکدا هێرشە ئاسمانی و مووشەکییە بێوێنەکانی سوپای ڕووسیا بۆ سەر شار و ژێرخانی ئۆکرانیا بەردەوامە، ڤۆلۆدیمێر زێلێنسکی، سەرۆکی ئۆکرانیا، دۆناڵد ترەمپ سەرۆکی ئەمریکای بە «ناپاکی» بەرامبەر کیێڤ تۆمەتبار کرد و ڕایگەیاند کە پاش ڕێککەوتنە ژێربەژێرەکانی لەگەڵ ڤلادیمێر پووتین، واشنتن پشتی لە ئۆکرانیا کردووە.
هێرشە نوێیەکانی مۆسکۆ بە چڕی وێستگەکانی وزە، پردەکان، بەندەرەکان و هێڵەکانی شەمەندەفەریان کردووەتە ئامانج، بە جۆرێک تەنها لەم هێرشانەی دواییدا کارەبای زیاتر لە ٦٠٠ هەزار خێزانی ئۆکرانی بە تەواوی پچڕاوە. هاوکات زیانە داراییەکانی شەڕ بە شێوەیەکی کەم وێنە هەڵکشاون:
ئابووریی ئۆکرانیا لە بەرامبەر هەر یەک کاتژمێری زەنگی مەترسیی هێرشی ئاسمانیدا، نزیکەی ٤٥ ملیۆن دۆلار زیانی پێدەگات.
زیانە ڕۆژانە ڕاستەوخۆکانی جەنگ بە ٤٥٠ ملیۆن دۆلار دەخەمڵێندرێن.
تەنها لە سەرەتای ئەمساڵەوە و بەهۆی بەئامانجگرتنی دامەزراوە ئابوورییەکان، ئۆکرانیا ١٠ ملیار دۆلار زیانی بەرکەوتووە، لەگەڵ پێشبینیی ٨ ملیار دۆلار زیانی دیکە بەهۆی پەککەوتنی بەندەرەکانەوە.
بەپێی خەمڵاندنەکانی حکومەتی ئۆکرانیا، تێچووی ئاوەدانکردنەوەی وڵاتەکە لە ئێستادا ١ تریلیۆن دۆلاری تێپەڕاندووە.
ئەم دۆخە پڕ لە کارەساتە لە کاتێکدایە کە کیێڤ ئیدارەی ترەمپ تۆمەتبار دەکات بەوەی هۆشدارییە هەواڵگرییە پێشوەختەکانی لەبارەی هێرشەکانی ڕووسیا ڕاگرتووە، و هاوکات سنووردارکردنی بۆ خزمەتگوزارییەکانی ئینتەرنێتی سەربازیی «ستارلینک» بۆ سوپای ئۆکرانیا سەپاندووە. ئەم هەنگاوانەی واشنتن لەگەڵ ڕێککەوتنی سووتەمەنی و دیزڵ لەگەڵ پووتین و پلانی هەڵگرتنی سزاکان لەسەر کەشتیگەلی سێبەری نەوتی ڕووسیا، لە لایەن چاودێرانەوە وەک هەوڵێکی ڕاستەوخۆی ترەمپ دەبینرێت بۆ ناچارکردنی کیێڤ بە ملدان بۆ دانوستان و کۆتاییهێنان بە جەنگ بە مەرجەکانی مۆسکۆ.