ھەرێم نیوز

تۆڕی هەواڵی «سی ئێن ئێن»ی ئەمریکی ئاشکرای کرد کە سوپای ویلایەتە یەکگرتووەکانی ئەمریکا تاوتوێی ئەگەری بەکارهێنانی بەهێزترین و گەورەترین بۆمبی نائەتۆمیی خۆی دەکات، کە بە «دایکی بۆمبەکان» (MOAB) ناسراوە، ئەوەش لە ئەگەری بڕیاردانی دۆناڵد ترەمپ سەرۆکی ئەمریکا بۆ دەستپێکردنەوەی خولێکی نوێی پێکدادانی سەربازی، دوای ئەوەی جەنگی نێوان هەردوولا گەیشتە چەقبەستوویی.

بەپێی زانیاریی سەرچاوە ئاگادارەکان، فەرماندەیی سەربازیی ئەمریکا تاوتوێی بەکارهێنانی بۆمبی گەورەی هەوایی جۆری «GBU-43/B» دەکات دژی ژێرخانی وزە و پێگە ئەتۆمییەکانی ئێران.

سەرەڕای هێزە وێرانکەرە بێوێنەکەی ئەم چەکە کە پێشتر لە ساڵی ٢٠١٧ دژی مۆڵگەکانی داعش لە ئەفغانستان بەکارهێنرا، شارەزایانی سەربازی گومانی قووڵیان هەیە لەوەی بتوانێت ئەو دامەزراوە ئەتۆمییانە تێکبشکێنێت کە لە قووڵایی چیاکان و لە ژێر چینە ئەستوورەکانی کۆنکرێتدا جێگیر کراون، و ئاماژە بەوە دەکەن کە بەکارهێنانی ئەم چەکە زیاتر بۆ کاریگەرییە دەروونییەکەی و وێرانکارییە بەرفراوانەکەی سەر ڕووی زەوییە.

هاوکات، بڵاوبوونەوەی ئەم زانیارییە سەربازییانە لە میدیاکاندا تووڕەییەکی توندی لای دۆناڵد ترەمپ سەرۆکی ئەمریکا لێکەوتەوە؛ ترەمپ لە میانی گردبوونەوەیەکی هەڵبژاردندا لە ویلایەتی ئاریزۆنا هێرشی توندی کردە سەر دزەپێکەرانی هەواڵ و ڕایگەیاند: «پێم وایە دەبێت تەقە لەو کەسانە بکرێت کە زانیارییە سەربازییەکان دەدەنە میدیا؛ لە ڕابردوودا کاتێک کەسێک کاتی هێرشکردنە سەر وڵاتێکی ئاشکرا دەکرد، تەقەی لێدەکرا و گوللەباران دەکرا».

ترەمپ بە توندی ڕەخنەی لە کەناڵی «سی ئێن ئێن» و ڕۆژنامەی «نیویۆرک تایمز» گرت بەهۆی بڵاوکردنەوەی جووڵە سەربازییەکان، و ئەو کەسانەی زانیاری دەدەنە ڕۆژنامەنووسان بە «نزمترین و بێڕێزترین کەسەکانی سەر زەوی» وەسف کرد، هاوکات جەختیشی لەوە کردەوە کە هێرش بۆ سەر ئێران بەر لە هەڵبژاردنەکانی نیوەی خول لە مانگی تشرینی دووەم (نۆڤەمبەر) ئەنجام نادرێت.