هەرێم نیوز
ئەنجوومەنی وەزیرانی هەرێمی کوردستان بڕیاری دا بە لێخۆشبوونی ١٠٠٪ـی سزای دواکەوتنی دەستەبەری کۆمەڵایەتی بۆ کەرتی تایبەت، و بۆ ئەم مەبەستەش مۆڵەتی سێ مانگ بە خاوەنکاران دەدات.
ئاسانکاریی نوێ بۆ خاوەنکاران و کەرتی تایبەت
ئەمڕۆ چوارشەممە، ١٤ی تشرینی یەکەمی ٢٠٢٦، وەزارەتی کار و کاروباری کۆمەڵایەتیی حکوومەتی هەرێمی کوردستان لە ڕاگەیەنراوێکدا ئاشکرای کرد، لە کۆبوونەوەی ئەمڕۆی ئەنجوومەنی وەزیران و لەسەر داواکارییەکی ئەوان، ئەنجوومەنی وەزیران بڕیاری لێخۆشبوونی ١٠٠٪ـی سزای دواکەوتنی دەستەبەری کۆمەڵایەتی بۆ کرێکاران و کارمەندانی کەرتی تایبەت دەرکردووە.
هەر لە ڕاگەیەنراوەکەدا وەزارەتەکە داوا لە سەرجەم خاوەنکاران و شوێنکارەکان دەکات سوود لەم دەرفەتە وەربگرن و لە ماوەی ٩٠ ڕۆژدا سەردانی بەڕێوەبەرایەتییەکانی دەستەبەری کۆمەڵایەتی بکەن. هاوکات سوپاسی سەرۆکوەزیران و جێگرەکەی و ئەندامانی ئەنجوومەنی وەزیرانیان کرد بۆ دەرکردنی ئەو بڕیارە ئاسانکارییە.
گرنگیی بڕیارەکە بۆ مافی کرێکاران
لە هەرێمی کوردستان، بەپێی یاسای کار و دەستەبەری کۆمەڵایەتی، پێویستە خاوەنکاران مانگانە بڕێک پارە بۆ کرێکار و کارمەندەکانیان وەک دەستەبەری کۆمەڵایەتی (خانەنشینیی کەرتی تایبەت) بدەنە حکوومەت.
ئەگەر خاوەنکارێک لە کاتی خۆیدا ئەو پارەیە نەدات، ڕووبەڕووی سزای دارایی دەبێتەوە و پارەیەکی زیاتری دەچێتە سەر.
لە ماوەی ڕابردوودا بەهۆی سستیی بازاڕ و قەیرانە یەک لەدوای یەکەکانەوە، بەشێکی زۆر لە کۆمپانیا و شوێنکارەکان نەیانتوانیوە پابەندی پێدانی ئەو بڕە پارەیە بن و سزایەکی زۆریان کەوتووەتە سەر.
بڕیارە نوێیەکەی ئەنجوومەنی وەزیران بە هەنگاوێکی گرنگ دادەنرێت بۆ ئاسانکاریکردن لە بەردەم کەرتی تایبەت و هاندانی خاوەنکاران بۆ ئەوەی کرێکارەکانیان لە پرۆسەی دەستەبەری کۆمەڵایەتی تۆمار بکەن، تاوەکو لە داهاتوودا مافی خانەنشینبوونیان بۆ دابین بکرێت.