هەرێم نیوز
هێزی دەریاییی سوپای پاسدارانی ئێران ئەنجامدانی هێرشێکی بۆ سەر کەشتییەکی گازهەڵگر لە باشووری گەرووی هورمز ڕاگەیاند و جەختی کردەوە کە هێرشەکە بەهۆی تێپەڕبوونی کەشتییەکە بووە لە ڕێڕەوێکی نایاسایی.
ئاگرکەوتنەوە لە کەشتییەکە و هۆکاری هێرشەکە
ئەمڕۆ هەینی، ٩ی تشرینی یەکەمی ٢٠٢٦، هێزی دەریاییی سوپای پاسدارانی ئێران لە ڕاگەیەندراوێکدا ئاشکرای کرد، کەشتییەکی گازهەڵگریان لە باشووری گەرووی هورمز کردووەتە ئامانج، بەهۆیەوە ئاگرێکی گەورە لە ژووری بزوێنەری کەشتییەکەدا کەوتووەتەوە.
لە ڕاگەیەندراوەکەدا ئاماژە بەوە کراوە، هۆکاری ئامانجگرتنی کەشتییەکە بۆ ئەوە دەگەڕێتەوە کە هەوڵی داوە لە "ڕێڕەوێکی نایاسایی"یەوە تێپەڕ ببێت. بەڵام سوپای پاسداران خاوەندارییەتیی کەشتییەکە و قەبارەی تەواوی زیانەکانیشی ئاشکرا نەکردووە.
ڕکابەری لەسەر داخرانی گەرووی هورمز
تاران جەخت دەکاتەوە کە گەرووی هورمز ناکرێتەوە تا ئەو کاتەی تەواوی مەرجەکانی ئێران جێبەجێ دەکرێن. لە بەرامبەردا، فەرماندەیی ناوەندیی هێزەکانی ئەمریکا (سێنتکۆم) ڕایگەیاندووە کە کەشتییەکان بەردەوامن لە هاتوچۆکردن و ڕێڕەوەکە داناخرێت.