هەرێم نیوز
سەباح نوعمان، گوتەبێژی فەرماندەی گشتیی هێزە چەکدارەکانی عێراق ڕایگەیاند کە لە چەند مانگی داهاتوودا یەکەمین کاروانی سیستەمەکانی بەرگریی ئاسمانی دەگەنە وڵات و دەبنە گەرەنتییەکی پتەو بۆ پاراستنی سەقامگیری لە سەرانسەری عێراق و هەرێمی کوردستان.
ئەمڕۆ چوارشەممە، 14ـی 10ـی 2026، سەباح نوعمان ڕایگەیان، که بەغدا لە ڕێگەی دیپلۆماسییەوە بەرپەرچی هێرشە دەرەکییەکان دەداتەوە و بە لێپێچینەوەی یاسایی ڕێگری لە پشێوییە ناوخۆییەکان دەکات.
ئاماژە بەوەش کراوە، گوتەبێژەکەی فەرماندەی گشتی جەختی لەسەر هاوبەشیی ستراتیژیی نێوان عێراق و هەرێمی کوردستان کردەوە و پێشمەرگەی بە بەشێکی سەرەکی لە پێکهاتەی ئەمنی و سەربازیی عێراق ناساند.
لە بەشێکی دیکەی لێدوانەکەیدا، نوعمان وێڕای پیرۆزبایی لە پرۆسەی یەکخستنی هێزەکانی پێشمەرگە، جەختی لەوە کردەوە که هەماهەنگیی بەهێز و ئاڵوگۆڕی بەردوامی زانیاری لە نێوان هەردوولادا تاکە ڕێگەیە بۆ ڕێگریکردن لە تێکچونی سەقامگیریی ناوچەکە.