هەرێم نیوز
بنیامین ناتانیاهۆ، سەرۆکوەزیرانی ئیسرائیل ڕایگەیاند کە بۆ کۆتاییهاتنی مەترسییەکانی ئێران دەبێت ڕژێمی ئەو وڵاتە بڕوخێنرێت، ئاماژەی بەوەش کرد کە زۆرینەی وڵاتانی ڕۆژهەڵاتی ناوەڕاست و ئەوروپا داوای هاوکاریی سەربازی لە ئیسرائیل دەکەن.
ئەمڕۆ چارشەممە، 14ـی 10ـی 2026، بنیامین ناتانیاهۆ لە لێدوانێکدا بۆ کەناڵی 14ـی ئیسرائیلی ڕایگەیاند کە ڕژێمی ئێران توندڕەو و هەوڵی زیندووکردنەوەی بەرنامە ئەتۆمییەکەی و دروستکردنەوەی حزبوڵا و حەماس دەدات، بۆیە تاکە ڕێگە بۆ نەهێشتنی ئەم مەترسییانە ڕووخانی ڕژێمی ئێرانە.
ئاماژە بەوەش کراوە، ناوبراو ئاشکرای کرد کە بە زەحمەت وڵاتێک لە ڕۆژهەڵاتی ناوەڕاست یان ئەوروپا و وڵاتانی ڕۆژئاوایی دەدۆزیتەوە کە داوای هاوکاریی سەربازی لە ئیسرائیل نەکات.
لە بەشێکی دیکەی قسەکانیدا، ناتانیاهۆ ڕەخنەی لەو وڵاتانە گرت کە لە لایەک ناوبانگی ئیسرائیل لەکەدار دەکەن و لە لایەکی تر داوای سیستەمی دژەمووشەکیی «ئارۆ» و چەکی پێشکەوتوو دەکەن، جەختیشی کردەوە کە ئیسرائیل ئێستا بۆتە بەهێزترین دەسەڵات لە ڕۆژهەڵاتی ناوەڕاست و یەکێک لە بەهێزترین وڵاتانی جیهان.