هەرێم نیوز
پەرەسەندنی بێوێنەی گرژییە دەریاییەکان؛ ئەمریکا کەشتییەکی بازرگانی لە کەنداوی عومان بۆردومان دەکات و خۆی بۆ هەڵمەتێکی سێ ڕۆژە دژی تاران ئامادە دەکات
لە هەنگاوێکی ئاشکرا و پڕمەترسیداردا، هێزەکانی فەرماندەیی ناوەندیی ئەمریکا (سێنتکۆم) هێرشێکی ڕاستەوخۆیان بۆ سەر کەشتییەکی بازرگانی لە کەنداوی عومان ئەنجام دا، ئەوەش بە بیانووی هەوڵدانی ئەو کەشتییە بۆ شکاندنی گەمارۆ دەریاییەی کە بەسەر بەندەرەکانی ئێراندا سەپێنراوە.
بەپێی ڕاگەیەندراوی سێنتکۆم، لە ماوەی سێ مانگی گەمارۆدانەکەدا، ئەمە پێنجەمین لێدانی هاوشێوەیە بۆ سەر کەشتییە بازرگانییەکان، هاوکات ١٠ کەشتیی نەوتهەڵگری سەر بە تۆڕە نهێنییەکەی سوپای پاسدارانی ئێران تێکشکێنراون و ١٣٥ کەشتیی دیکەش ناچار کراون ڕێڕەوی خۆیان بگۆڕن.
ئەم ڕێکارانە هاوکاتە لەگەڵ بەرزبوونەوەی بەرچاوی هێرشەکان بۆ سەر کەشتییە نەوتهەڵگرەکان لە گەرووی هورمز لە هەفتەی ڕابردوودا، کە بووەتە هۆی دابەزینێکی بەرچاو لە هەناردەکردنی نەوتدا دوای ئەوەی لە مانگی ئەیلوولدا بۆ ٨١٪ـی ئاستی پێش جەنگ بەرزبووبووەوە.
ئەم پێکدادانە دەریاییە بە جێبەجێکردنی کرداریی هەڕەشەکانی محەمەد باقر قالیباف، سەرۆکی پەرلەمانی ئێران دادەنرێت کە پێشتر هۆشداریی دابوو ئەگەر ڕێگری لە فرۆشتنی نەوتی ئێران بکرێت، ڕێگە بە هیچ دەوڵەتێکی ناوچەکە نادرێت نەوت هەناردە بکات.
هاوکات لەگەڵ ئاڵۆزییە دەریاییەکان، ئاماژەکان بۆ ئەگەری دەستپێکردنەوەی ئۆپەراسیۆنی سەربازیی بەرفراوانی ئەمریکا دژی تاران ڕوو لە زیادبوونن؛ ڕۆژنامەی «نیویۆرک تایمز» ئاشکرای کردووە کە واشنتن لە ئامادەباشیدایە بۆ ئەنجامدانی هەڵمەتێکی سەربازیی کورت و چڕ کە نزیکەی سێ ڕۆژ دەخایەنێت، بە ئامانجی لێدانی جبەخانەی مووشەکی و درۆنەکانی ئێران، وێڕای وێرانکردنی دامەزراوەکانی وزە و چەندین پێگەی سەربازیی دیکە لە سەرتاسەری ئەو وڵاتەدا.