هەرێم نیوز
مونا قەهوەچی، جێگری سەرۆکی پارتی چاکسازیی تورکمان ڕایگەیاند، دوای ماوەیەکی درێژ لە چاوەڕوانی، گەلی کوردستان چیتر پاساو بۆ کارانەکردنەوەی پەرلەمان و پێکنەهێنانی کابینەی نوێی حکومەت قبووڵ ناکات.
ئەمڕۆ سێشەممە، 21ـی 7ـی 2026، مونا قەهوەچی، جێگری سەرۆکی پارتی چاکسازیی تورکمان ڕاگەیەندراوێکی بڵاوکردەوە، و ڕایگەیاند، هاووڵاتییان بە مافی خۆیان چاوەڕوانی ئەوەن کە دامەزراوە دەستوورییەکان ئەرک و بەرپرسیارێتییەکانیان بەجێ بهێنن و وەڵامی پێویستییەکانی قۆناغی ئێستا بدەنەوە.
مونا قەهوەچی ئاماژەی بەوەش کردووە، کە کاراکردنەوەی پەرلەمان و خێراکردنی پرۆسەی پێکهێنانی کابینەی نوێ، تەنیا داواکارییەکی سیاسی نییە، بەڵکو پێویستییەکی نیشتمانییە بۆ پاراستنی جێگیریی سیاسی، گەشەپێدانی ئابووری و چارەسەرکردنی کێشەکانی هاووڵاتییان، و هەر دواکەوتنێکی دیکەش کاریگەریی نەرێنی لەسەر متمانەی خەڵک بە دامەزراوەکان جێدەهێڵێت.
جێگری سەرۆکی پارتی چاکسازیی تورکمان ئەوەشی خستەڕوو، کە بەرژەوەندیی گشتی دەخوازێت قۆناغی چاوەڕوانی کۆتایی پێبێت و هەموو هێزە سیاسییەکان بەرپرسیارانە هەنگاوی جدی بنێن بۆ پێکهێنانی حکومەتێک کە وەڵامدەرەوەی داواکارییەکانی خەڵک بێت.