هەرێم نیوز
سەرۆکی هەرێمی کوردستان لە چوارچێوەی هەوڵە دیپلۆماسییەکانیدا بۆ یەکخستنی هەڵوێستەکان و پاراستنی سەقامگیریی عێراق، سەردانی بەغدای پایتەختی کرد و لەگەڵ سەرکردە باڵاکانی وڵات کۆبووەوە.
تاوتوێکردنی دۆخی ناوچەکە و سەردانەکەی واشنتۆن
ئەمڕۆ دووشەممە ١٣ی تەممووزی ٢٠٢٦، سەرۆکایەتیی هەرێمی کوردستان ڕایگەیاند، شەوی ڕابردوو یەکشەممە ١٢ی تەممووز، نێچیرڤان بارزانی، سەرۆکی هەرێمی کوردستان، لەسەر بانگهێشتی فەرمیی "هاوپەیمانیی بەڕێوەبردنی دەوڵەت" (کە پێکهێنەری سەرەکیی حکومەتی فیدراڵییە)، گەیشتە بەغدا و بەشداریی لە کۆبوونەوەی فراوانی هاوپەیمانییەکەدا کرد.
لە کۆبوونەوەکەدا، بارودۆخی گشتیی سیاسی و ئەمنیی عێراق و دوایین پێشهات و پەرەسەندنە خێراکانی ناوچەی ڕۆژهەڵاتی ناوەڕاست بە چڕی تاوتوێ کران. تەوەرێکی سەرەکیی کۆبوونەوەکە تەرخانکرا بۆ بیروڕاگۆڕینەوە دەربارەی بەرنامە و ستراتیژیەتی سەردانی چاوەڕوانکراوی سەرۆکوەزیرانی عێراق بۆ واشنتۆن؛ لەمبارەیەوە سەرۆکی هەرێم و سەرکردە عێراقییەکان جەختیان لەسەر گرنگیی یەکجار گەورەی ئەم سەردانە لەم کاتە هەستیارەدا کردەوە، بە جۆرێک کە لە بەرژەوەندیی باڵای عێراق و بەهێزکردنی پەیوەندییە نێودەوڵەتییەکانیدا بێت.
ڕەتکردنەوەی شەڕ و چەسپاندنی زمانی گفتوگۆ
ئامادەبووانی کۆبوونەوەکە داکۆکیی توندیان لە پێشخستنی زمانی گفتوگۆ، لێکگەیشتنی هاوبەش و چارەسەرکردنی کێشەکان بە ڕێگەی ئاشتییانه کرد. هەروەها بە توندی پەرەسەندنی ئاڵۆزییە سەربازییەکان و بژاردەی شەڕیان لە ناوچەکەدا ڕەتکردەوە.
لەم چوارچێوەیەدا، ئامادەیی تەواوی عێراق (بە هەرێمی کوردستان و حکومەتی فیدراڵییەوە) نیشان درا بۆ ئەوەی وڵات ببێتە چەق و ناوچەیەکی ئارامی بەیەکگەیشتن، نێوەندگیری و پەرەپێدانی بەرژەوەندییە ئابووری و سیاسییەکانی گەلانی ناوچەکە، نەک ببێتە مەیدانێک بۆ یەکلاکردنەوەی ململانێ لاوەکییەکان.