هەرێم نیوز
پارتی ژیانی ئازادی کوردستان (پەژاک)، لە ڕاگەیەندراوێکدا نیگەرانیی قووڵی خۆی بەرامبەر بە زیادبوونی هێرشەکانی کۆماری ئیسلامیی ئێران بۆ سەر هێز و پارتە سیاسییەکانی کوردستان و خەڵکی مەدەنی دەربڕی.
ئەمڕۆ هەینی، ٣ـی ٧ـی ٢٠٢٦، پژاک لە ڕاگەیەندراوەکەیدا ئاماژەی بەوە کردووە، دوای ئیمزاکردنی لێکگەیشتننامەی نێوان کۆماری ئیسلامیی ئێران و ئەمەریکا، ئێران هەوڵ دەدات ڕاگرتنی شەڕ وەک دەرفەتێک بۆ توندکردنەوەی سەرکوتکارییەکانی ناوخۆ و دژایەتیکردنی گەلی کورد بەکار بهێنێت.
پژاک ئاماژەی بەوە داوە کە شەڕی ڕژێم دژی کۆمەڵگاکانی ئێران چووەتە قۆناغێکی خوێناوییەوە و بەنیازە بە سێدارە و تۆقاندن ئیرادەی گەلان تێک بشکێنێت.
لە ڕاگەیەندراوەکەدا بە وردی ئاماژە بە چەندین هێرش کراوە، لەوانە هێرشکردنە سەر گەریلاکانی پژاک لە مەریوان، بانە و مەهاباد، کە بووەتە هۆی شەهیدبوونی ٤ گەریلا، هەروەها هەڵکوتانە سەر پێشمەرگەکانی حیزبی دیموکراتی کوردستانی ئێران لە پیرانشار کە بووە هۆی شەهیدبوونی ٦ پێشمەرگە، لەگەڵ کوژرانی گەنجێکی مەهابادی بە ناوی سیاوەش ئەلەک.
پژاک لە کۆتایی ڕاگەیەندراوەکەیدا پێنج خاڵی وەک هەڵوێستی فەرمیی خۆی دیاری کردووە:
بەرگریی ڕەوا: جەخت لەوە دەکەنەوە کە بە دروشمی "بەرخۆدان ژیانە"، بەرگری لە خۆیان و گەلەکەیان بە مافێکی زاتی دەزانن.
سەربەخۆیی فکری: ڕایان گەیاندووە کە تێکۆشانی پارتەکەیان لە چوارچێوەی سەربەخۆیی فکری و کرداریدایە و بانگەشەکانی ئێران سەبارەت بە پەیوەندی بە وڵاتانی دەرەکییەوە ڕەت دەکەنەوە.
هەڵوێستی شەڕ: جەخت دەکەنەوە لەسەر ئەوەی هێزەکانیان لە پێگەی بەرگریی ڕەوادان و نایانەوێت شەڕ لە ناوچەکەدا پەرە بستێنێت، چونکە پێیان وایە ئێران بە بیانووی شەڕ سەرکوتکارییەکانی خۆی پاساو دەدات.
سەرکۆنەی تیرۆر: هێرشەکان بە نموونەی ئاشکرای تیرۆریزمی دەوڵەتی دەزانن و سەرەخۆشی لە بنەماڵەی شەهیدانی گەریلا و پێشمەرگە دەکەن.
سیاسەتی تۆقاندن: ئاماژە بەوە دەکەن کە بەکارهێنانی خەڵکی بەکرێگیراو بۆ کۆمەڵکوژی و سووکایەتی بە خەڵک، بەشێکە لە سیاسەتی تۆقاندنی ڕژێم.