هەرێم نیوز
سەرۆکی حکومەتی هەرێمی کوردستان بەبۆنەی جەژنی سەری ساڵی ئێزیدییەکانەوە، پەیامێکی پیرۆزبایی ئاراستەی خوشک و برایانی ئێزیدی لە کوردستان و جیهان دەکات و ڕایدەگەیەنێت، حکومەت بەردەوام دەبێت لە پشتگیریکردنی ماف و داخوازییەکانیان.
مەسرور بارزانی، سەرۆکی حکومەتی هەرێمی کوردستان ئەمڕۆ چوارشەممە، ١٥ی نیسانی ٢٠٢٦، لە پەیامێکدا ڕایگەیاند: "بەبۆنەی سەری ساڵی ئێزیدییان، گەرمترین پیرۆزبایی ئاراستەی تەواوی خوشک و برایانی ئێزیدی لە کوردستان و جیهان دەکەم. هیوادارم ئەم جەژنە لە کەشێکی پڕ لە ئاشتی و تەناهیدا بەسەر ببەن."
سەرۆکی حکومەت لە پەیامەکەیدا جەختی لە هەڵوێستی فەرمیی کابینەکەی کردەوە و وتی: "بە بەم بۆنەیەوە دووپاتی پشتگیریی حکومەتی هەرێمی کوردستان بۆ ماف و داخوازییەکانی خوشک و برایانی ئێزیدی دەکەینەوە."
مەسرور بارزانی لە کۆتایی پەیامەکەیدا هیوای خواست ئێزیدییەکان هەمیشە لە خۆشی و شادییدا بژین و جەژنەکەیان لێ پیرۆز بێت.
ئەم پەیامە لە کاتێکدایە کە ساڵانە لە چوارشەممەی یەکەمی مانگی نیسان (بەپێی ڕۆژژمێری ڕۆژهەڵاتی)، ئێزیدییەکان جەژنی "سەری ساڵ" یان "چوارشەممە سوور" بەرز ڕادەگرن و وەک جەژنێکی نەتەوەیی و ئایینی دێرین یادی دەکەنەوە.