هەرێم نیوز
سەرۆک وەزیرانی ئیسرائیل دروستکردنی هاوپەیمانییەکی نوێی لە ناوچەکەدا ڕاگەیاند، کە ئامانج لێی ڕووبەڕووبوونەوەی ئەوەیە کە بە "بەرەی داڕماوی شیعە" و "بەرەی پێکهاتووی سوننە" ناوی دەبات و چەندین وڵاتی جیاواز لەخۆ دەگرێت.
ئەمڕۆ یەکشەممە 22ی 2ی 2026، بێنیامین نەتانیاهو، سەرۆک وەزیرانی ئیسرائیل ئاشکرای کرد کە کار بۆ پێکهێنانی بەرەیەکی نوێ لە ناوچەکەدا دەکەن، تاوەکو ببێتە جێگرەوە و بەربەستێک لە بەردەم ئەو دوو جەمسەرەی ئێستا بوونیان هەیە. نەتانیاهو ئاماژەی بەوە کرد کە ئەم هاوپەیمانییە نوێیە بۆ ڕووبەڕووبوونەوەی ئەو لایەنانە دەبێت کە خۆی بە "بەرەی داڕماوی شیعە" و "بەرەی پێکهاتووی سوننە" وەسفی کردوون.
لەبارەی وڵاتە بەشداربووەکانی ئەم بەرە نوێیەوە، سەرۆک وەزیرانی ئیسرائیل ڕوونی کردەوە کە ئەو هاوپەیمانییەی ئێستا کاری لەسەر دەکرێت، پێکهاتەیەکی بەرفراوان دەبێت. هاوپەیمانییەکە هیندستان و چەندین وڵاتی عەرەبی، ئەفریقی و دەریای ناوەڕاستی وەک یۆنان و قوبرس لەخۆ دەگرێت، سەرباری چەند وڵاتێکی ئاسیایی کە ناوبراو ئامادە نەبوو لە ئێستادا ناوەکانیان ئاشکرا بکات.
نەتانیاهو لە درێژەی قسەکانیدا جەختی لەوە کردەوە کە ئەوان سیستەمێکی یەکگرتوو و گشتگیر دروست دەکەن، کە زیاتر لە هاوپەیمانییەکی شەشگۆشەیی دەچێت لە دەوروبەری ڕۆژهەڵاتی ناوەڕاست یان لە ناوەوەیدا.
ئەمەش وەک ئاماژەیەک بۆ ئەو گۆڕانکارییە گەورانەی کە تەلئەبیب دەیەوێت لە نەخشەی سیاسی و ئەمنیی ناوچەکەدا دروستی بکات بۆ بەهێزکردنی پێگەی خۆی.