هەرێم نیوز
ئێوارەی ئەمڕۆ چوارشەممە، مەسرور بارزانی، سەرۆکی حکومەتی هەرێمی کوردستان، پێشوازی لە جۆشوا هاریس، هەڵسوڕێنەری باڵیۆزخانەی ئەمریکا لە عێراق کرد. لە دیدارەکەدا پەرەپێدانی پەیوەندییە دوولایەنەکان و هەنگاوەکانی پێکهێنانی کابینەی نوێی حکومەتی فیدراڵ و هەرێمی کوردستان تاوتوێ کران.
هەر دوولا جەختیان لە پێویستیی پێکهێنانی حکومەتێکی بەهێز لە بەغداد کردەوە کە پابەندی دەستوور و سیستەمی فیدراڵی بێت و ڕێز لە قەوارە و مافە دەستوورییەکانی هەرێمی کوردستان بگرێت، بە جۆرێک بێ جیاوازی خزمەتی هەموو پێکهاتەکان بکات.
هاوکات جەخت لە گرنگیی پێکهێنانی کابینەیەکی بەهێز و سەرتاسەری لە هەرێمی کوردستان کرایەوە بۆ قۆناغی داهاتوو.
لە تەوەرێکی دیکەی کۆبوونەوەکەدا، جۆشوا هاریس پیرۆزبایی و دەستخۆشی ئاراستەی سەرۆکی حکومەت کرد بۆ سەرکەوتنی پڕۆسەی چاکسازییەکانی کابینەی نۆیەم لە کەرتە جیاوازەکاندا و پشتیوانی وڵاتەکەشی بۆ بەردەوامیی ئەو هەنگاوانە دووپات کردەوە.