هەرێم نیوز
وەزارەتی دەرەوەی میسر رایگەیاند، وه‌زیرانی ده‌ره‌وه‌ی توركیا و میسر تاوتوێی په‌یوه‌ندییه دووقۆڵییه‌كان نێوان هه‌ردوو وڵات و پرسی غه‌ززه و هه‌وڵه‌كان بۆ ئاگربه‌ست ده‌كه‌ن.
ئەمڕۆ شه‌ممه، 5ـی 4ـی 2025، هاكان فیدان، وه‌زیری ده‌ره‌وه‌ی توركیا و به‌در عه‌بدولعاتی، وه‌زیری ده‌ره‌وه‌ی میسر به ته‌له‌فۆن قسه‌یان كرد و به‌گشتیی په‌یوه‌ندییه دووقۆڵییه‌كان نێوان ئه‌نقه‌ره و قاهیره‌یان تاوتوێ كرد.
به گوێره‌ی ڕاگه‌یه‌نراوی وه‌زاره‌تی ده‌ره‌وه‌ی میسر، هه‌ردوولا جه‌ختیان له‌سه‌ر هه‌وڵه‌كان بۆ دووباره ڕاگه‌یاندنی ئاگربه‌ست له غه‌ززه و جێبه‌جێكردنی قۆناغه‌كانی كردووه‌ته‌وه.
وه‌زاره‌تی ده‌ره‌وه‌ی میسر ئاماژه‌ی به‌وه‌ش كردووه، فیدان و عه‌بدولعاتی باسیان له دۆخی سوودان و هه‌وڵه‌كانی بۆ سه‌قامگیریی له‌و وڵاته كردووه.