هەرێم نیوز
وەزارەته‌كانی کارەبا و سامانە سروشتییەکان ڕایانگه‌یاند، له ئه‌مشه‌وه‌وه کۆمپانیای دانه‌غاز پڕۆسەی سازدانەوە و چاکسازی لە کێڵگەی کۆڕمۆر ئه‌نجامده‌دات و چاوەڕواندەکرێت لەڕێگەی ئەنجامدانی ئەم پڕۆسەیەوه ئاستی خزمەتگوزاری کارەبا لە وەرزی هاویندا بەشێوەیەکی بەرچاو بەرزبێتەوە.
وەزارەته‌كانی کارەبا و سامانە سروشتییەکانی حكومه‌تی هه‌رێمی كوردستان له ڕاگه‌یه‌ندراوێكی هاوبه‌شدا باس له‌وه‌ده‌كه‌ن، "بە مەبەستی ئامادەکاری بۆ هاتنی وەزی هاوینی ئەمساڵ، کۆمپانیای دانه‌غاز هەڵدەستێت بە ئەنجامدانی پڕۆسەی سازدانەوە و چاکسازی لە کێڵگەی کۆڕمۆر، ئەم پرۆسەیە لە کاتژمێر 12ـی ئەمشەوەوە دەستپێدەکات و سێ هەفتە دەخایەنێت".
ئەوەش هاتووە، هەریەک لە وەزارەتی کارەبا، وەزارەتی سامانە سروشتیەکان و کۆمپانیای دانه‌غاز هەماهەنگی نزیکیان دەبێت بۆ ئەوەی پڕۆسەکە بەشێوەیەکی سەرکەوتوو ئەنجام بدرێت.
له ڕاگه‌یه‌ندراوه‌كه‌دا هاتوه، چاوەڕوان دەکرێت لەڕێگەی ئەنجامدانی ئەم پڕۆسەیەوه ئاستی خزمەتگوزاری کارەبا لە وەرزی هاویندا بەشێوەیەکی بەرچاو بەرزبێتەوە.