هەرێم نیوز

سەرۆكی لقی سلێمانی كۆمسیۆنی باڵای سەربەخۆی هەڵبژاردنەكانی عێراق رایدەگەیەنێت، هیچ ئەندامێكمان بەشداریی كۆنفرانسی گۆڕانی گردەكەی نەكردووە، جەختیشدەكاتەوە كە دەبێت هەردوو باڵەكەی گۆڕان (گردەكەو كوردسات) چاوەڕێ بكەن تاوەكو كۆمسیۆن نوسراو دەردەكات بۆ دیاریكردنی كات‌و شوێنی كۆنفرانس.

ئامانج عەزیز، سەرۆكی لقی سلێمانی كۆمسیۆنی باڵای هەڵبژاردنەكانی عێراق ڕایگەیاند، هیچ ئەندامێكی لقی سلێمانی كۆمسیۆن بەشداریی كۆنفرانسەكەی گۆڕانی گردەكەی نەكردوە، چونكە ئەو داواكارییەی كە گۆڕانی گردەكە بۆ بەستنی كۆنفرانس پێشكەشیكردبوو، تێیدا داوایكردبوو كە لەفەرمانگەی پارت‌و ڕێكخراوە سیاسییەكان ئەندامێك بەشداربێت، بەڵام ئەوانیش بەشدارنەبوون.

ئاماژەی بەوەشكرد، دەبێت هەردوو باڵەكەی گۆڕان (گردەكەو كوردسات) چاوەڕێ بكەن تاوەكو كۆمسیۆن نوسراو دەردەكات بۆ دیاریكردنی كات‌و شوێنی كۆنفرانس، كە بەگوێرەی نوسراوێك كە 4ی نیسانی 2025 لەكۆمیسیۆنەوە دەرچوە، داوا لەهەردوو باڵەكەی گۆڕان كراوە چاوەڕێبكەن تاوەكو كۆمسیۆن كات‌و شوێنی كۆنفرانس دیاریی دەكات، دواتر كاتی كۆنفرانس دیاریبكەن، هەر بەگوێرەی نوسراوەكە، نابێت كاتی بەستنی كۆنفرانس لە 10ی نیسان تێپەڕ بكات.

سەرۆكی لقی سلێمانی كۆمسیۆنی باڵای هەڵبژاردنەكانی عێراق ئەوەشیخستەڕوو، بەهۆی پشوەوە بەفەرمی نوسراوەكە نەگەیشتوەتە نوسینگەی كۆمسیۆن لەسلێمانی‌ و ئاراستەی باڵەكانی گۆڕان نەكراوە كە تیایدا كات و شوێنی بەستنی كرنفرانس دیاری بكات.