هەرێم نیوز

لێکۆڵینەوە لە نەتەنیاهۆدا دەستی پێکردووە و قەتەر لەپێناو وێناکردنی وڵاتەکە بەشێوەیەکی ئەرێنی پارەی بە دوو راوێژکاری میدیایی سەرۆک وەزیرانی ئیسرائیل بەخشیوە. بەهۆیەوە هەردوو راوێژکارەکەی نەتەنیاهوی راپێچی زیندان کراون.

ماوەی چەند ساڵێکە بنیامین نەتەنیاهۆ، سەرۆک وەزیرانی ئیسرائیل، بەڕێگەی دادگاوەیە لەسەر ژمارەیەک دۆسیەی گەندەڵی، تەنانەت لە کاتی شەڕی غەززەشدا لێکۆڵینەوەکان لەگەڵ سەرۆک وەزیراندا رانەوەستا. لە نوێترین پێشهاتدا نەتەنیاهۆ رووبەڕووی کێشەیەکی دیکەی یاسایی بووەتەوە بەهۆی پێدانی وەرگرتنی پارە لەلایەن دوو راوێژکاری  میدیایی ناوبراوەوە.

دوو راوێژکاری میدیای باڵای نەتەنیاهۆ تێوەگلاون لە وەگرتنی پارە لە وڵاتی قەتەر کە دۆسیەی "قەتەرگەیت" یان (دەروازەی قەتەر) ناسراوە. دوو راوێژکارەکە لە بەرامبەر وەرگرتنی پارە هەوڵیانداوە لە میدیای ئیسرائیل کار بۆ بەرژەوەندییەکانی قەتەر بکەن. دۆسیەکە توڕەییەکی زۆری لە ئیسرائیل دروستکردووە، چونکە قەتەر وەکو وڵاتیكی دژە ئیسرائیل ناسراوە کە ساڵانێکە میوانداریی سەرکردە باڵاکانی حەماس دەکات.

بەپێی تۆمارەکانی دادگا، قەتەر لەڕیگەی نێوەندگیرەوە کاری لەگەڵ راوێژکارەکانی نەتەنیاهۆ کردووە، راوێژکارەکان لەلایەن گروپێکی لۆبی ئەمەریکی (ThirdCircle)ـەوە کاریان کردووە، کە نوێنەری قەتەرن لە چەندین وڵات لەوانە ئەمەریکا.

بەپێی تۆمارەکانی دادگا، گروپە ئەمەریکییەکە بە نوێنەرایەتی قەتەر پارەیان بەخشیوە بە راوێژکارە میدیاییەکانی نەتەنیاهۆ.

سەبارەت بە رۆڵی سەرۆک وەزیرانی ئیسرائیل، بەپێی تۆمارەکانی دادگا، هەرچەندە نەتەنیاهۆ تۆمەتباری سەرەکی نییە، بەڵام لەلایەن پۆلیسی ئیسرائیلەوە لێکۆڵینەوەی لەگەڵدا کراوە.

بەپێی راپۆرتە هەواڵییەکان، سەرەتا شین بێت ناسراو بە (شاباک)، دەستی کردووە بە لێکۆڵینەوە لە وەرگرتنی پارە لەلایەن دوو راوێژکاری سەرۆک وەزیرانەوە، لەبەر ئەو هۆکارەش بووە کە نەتەنیاهۆ بڕیاری دوورخستنەوەی بەرپرسی شاباکی داوە.

بەپێی دادگای ئیسرائیل، هەریەکە لە جۆناسان ئوریچ و ئێڵای فیڵدشتاین ئەو دوو میدیاکارەن کە لە رێگەی لایەنی سێیەمەوە کاریان کردووە بۆ دروستکردنی وێنایەکی ئەرێنی قەتەر لە میدیای ئیسرائیلدا.

ئەو دوو راوێژکارە میدیایە لەلایەن پۆلیسی ئیسرائیلەوە دەستگیرکراون و لێکۆڵێنەوە لەگەڵیاندا بەردەوامە.

پێشتریش، ئاژانسی هەواڵی رۆیتەرز بڵاویکردووەتەوە، رۆژی دووشەممە 17ـی 3ـی 2025، بنیامین نەتەنیاهۆ، سەرۆک وەزیرانی ئیسرائیل گفتوگۆی لەگەڵ وەزیرەکانی سەر بە پارتی لیکود کرد و هۆی دوورخستنەوەی ڕۆنێن بار، سەرۆکی دەزگای  'شاباک'ی ڕوون کردووەتەوە و وتی: "هەراسانی کردم".

رۆیتەرز لە زاری کەناڵ 14ـی ئیسرائیلی/عیبرییەوە ڕایگەیاندووە: نەتەنیاهۆ ئاشکرای کردووە کە یەکێک لە وەزیرەکان پێی وتووە "ڕۆنێن بار، بە هەڕەشە هەراسانی کردووە و دەسەڵات و کاریگەریی ئاژانسەکەی بۆ ترساندنی قۆستووەتەوە بۆ ئەوەی لە پێگەی خۆیدا بمێنێتەوە."

نەتانیاهۆ ئەوەشی خستووەتەڕوو، "ئەو دەزگایە، پێچەوانەی ئەوەیە کە ڕۆنێن بار هەوڵی دروستکردنی دەدات و بۆ ترس و تۆقاندن نابێت."

ئاماژەی بەوەشکردووە، "سەرۆکی ڕێکخراوی شاباک لێکۆڵینەوەیەکی بێهودەی لە کاروباری "قەتەر گەیت" دروست کرد تاکو لە دەسەڵات بەردەوام بێت، کاتێک زانی بەنیازم لە پۆستەکەی دووری بخەمەوە."