هەرێم نیوز

عەلی باپیر، سەرۆكی كۆمەڵی دادگەریی كوردستان بڵاویکردەوە، لە دوای ڕووخانی ڕژێمی ئەسەد نامەیەکی بۆ ئەحمەد شەرع، فەرماندەی گشتیی بەڕێوەبردنی سووریا ناردووە و تیایدا خۆشحاڵیی خۆی بۆ ڕووخاندنی دەسەڵاتی بەشار ئەسەد دەربڕیوە.

سەرۆکی کۆمەڵی دادگەری، دەقی ئەو نامەیەی بۆ ئەحمەد شەرعی ناردووە بە هەردوو زمانی کوردی و عەرەبی بڵاو کردووەتەوە و نووسیویەتی "خۆشحاڵم كە ئەم نامەیەتان بۆ دەنێرم، پاش پیرۆزبایی لێكردنتان بە سەركەوتن بەسەر ڕژێمی دیكتاتۆریی فەوتاودا."

هەر لە نامەکەیدا، عەلی باپیر، ئەمیری کۆمەڵی دادگەری دەڵێت: "ئومێدمان وایە ئەو كاروانە بەپیت و فەڕە بەردەوام بێت بۆ تەواوكردنی بەدەستهێنانی خواستەكانی گەلانی سووریا و دەستەبەركردنی مافەكانی هەموو هاووڵاتییان بە عەرەب و كورد و هەموو خەڵكی ئەو وڵاتە."

هەروەها نووسیویەتی: "خوازیارین گەلی كوردمان خۆشیی لە بوون و مافەكانی ببینێ لە چوارچێوەی حوكمڕانیی داهاتوو لە ژێر سەركردایەتیی دانایانەتاندا."

ئەمەش لەکاتێکدایە، دوای 13 ڕۆژ لە شەڕ و پێکدادان، دواجار 8ی کانوونی یەکەمی 2024، دوای گەیشتنی هێزەکانی بەرەی تەحریر شام، بە سەرکردایەتیی، ئەحمەد شەرع بۆ دیمەشق، کۆتایی بە دەسەڵات و ڕژێمی سووریا بە سەرۆکایەتیی بەشار ئەسەد هێنرا.