هەرێم نیوز
ئەمڕۆ سێشهممه نێچيرڤان بارزانى، سەرۆکی هەرێمی کوردستان پێشوازی لەجهنهراڵ كێڤن لێيهى، فەرماندەی هێزەکانی هاوپەیمانيی نێودەوڵەتی لە عێراق و سووریا، کرد.
ماڵپەری سەرەکی سەرۆکایەتی هەرێم لە بڵاوکراوەیەکدا رایگەیاند: لە کۆبوونەوهيەکدا که وهزیری کاروباری پێشمهرگه ئامادهی بوو، دوایین پێشهاتەکانی دۆخی ئەمنييان لە عێراق و سووریا تاوتوێ كرد، ههروهها لە چوارچێوەی هەوڵەکانی بەرەنگاربوونەوەی تیرۆر و لەناوبردنی پاشماوەکانی داعشدا، جهختيان له پتەوکردنی هاوکاری و هەماهەنگيی نێوان هێزەکانی پێشمەرگە و سوپای عێراقی لەگەڵ هێزەکانی هاوپەیمانيی نێودەوڵەتيدا، كردهوه.
سەرۆک نێچيرڤان بارزانى، وێڕاى داكۆكى لەسەر گرنگيی بەردەوامبوونی پشتگیريی هاوپەیمانيی نێودەوڵەتی بۆ عێراق، ستایشی هەماهەنگيی هاوبەشی لەگەڵ هاوپەیمانان لە ڕووبەڕووبوونەوەی هەڕەشە تیرۆریستییەکان کرد، ههروهها هاوکاريی بەردەوامى نێوان هەموو لایەنەکانى، به کلیلی بەهێزکردنی ئاسایش لە عێراق، لهقهڵهمدا.
ئاماژە بەوەشدراوە، ژەنەراڵ لێيهى، ستايشى ڕۆڵى هەرێمی کوردستان و هێزەکانی پێشمەرگەی لە شەڕی دژەتیرۆردا کرد و پابەنديی هێزەکانی هاوپەیمانانى بۆ بەردەواميی پشتگیری له عێراق و ههرێمى كوردستان دووپات كردهوه بۆ پاراستنى ئارامى و سەقامگیری و نههێشتنى مهترسى و ههڕهشهكانى داعش.
لە راگەیاندراوەکەشدا هاتوە، داكۆكى له بەردەوامبوونی هەماهەنگی و ڕاوێژکردنی هاوبەش بۆ دڵنیابوون لە سەقامگیری و ڕووبەڕووبوونەوەی ئاڵنگارییە ئەمنییەکانی ئێستای ناوچەکە و چهند پرسێكى ديكهى جێى بايهخى هاوبهش، تهوهرێكى ديكهى كۆبوونهوهكه بوو.