هەرێم نیوز
جێگری یه‌كه‌می سه‌رۆكی ئه‌نجومه‌نی نوێنه‌رانی عێراق، رایگەیاند، دۆخی ئەمنی پارێزگای میسان خراپە و ده‌بێت لێپرسینه‌وه‌ی توند له‌گه‌ڵ ئەو تاوانبارانە بكرێت كه به‌رپرسیارن له تێكدانی بارودۆخه‌كه.
حاكم زاملی، جێگری یه‌كه‌می سه‌رۆكی ئه‌نجومه‌نی نوێنه‌رانی عێراق له‌ڕاگه‌یه‌ندراوێكدا هۆشداری لەدۆخی ئێستای پارێزگای میسان دەدا و رایدەگەیەنێت، ده‌بێت فه‌رمانده ئه‌منییه‌كان لێپرسینه‌وه‌ی توند له‌گه‌ڵ تاوانباران یان تیرۆرسته‌كان ئه‌نجامبده‌ن كه به‌رپرسیارن له تێكدانی بارودۆخه‌كه.
جێگری یه‌كه‌می سه‌رۆكی ئه‌نجومه‌نی نوێنه‌ران، داواشی له سه‌رۆك هۆز و هاوڵاتیانی ره‌سه‌نی عێراقی كردوە، دانایی و هێمنی زاڵ بكه‌ن و ده‌نگی هۆشیاریی بڵاوبكه‌نه‌وه بۆئه‌وه‌ی خوێنی خه‌ڵكی وڵات و تائیفیه‌ت یه‌كبخه‌ن و چیتر خوێن نه‌ڕێژن.
راشیگەیاندوە، گرنگه وه‌ڵامی ئه‌و ده‌ستپێشخه‌ریانه بدرێته‌وه كه له‌لایه‌ن هه‌ندێك له كه‌سایه‌تی ئاینی و سیاسییه‌كانه‌وه خراونه‌ته‌ڕو، له‌پێشی هه‌مویانه‌وه ده‌ستپێشخه‌رییه‌كه‌ی موقته‌دا سه‌در رێبه‌ری ره‌وتی سه‌در كه په‌یوه‌سته به پێكهێنانی شاندێكی باڵا بۆ هێوركردنه‌وه‌و چاره‌سه‌ركردنی ناكۆكییه‌كان و تێپه‌ڕاندنی به‌مه‌ترسی و كۆتایهێنان به ئاژاوه و پاراستنی ئاشتی كۆمه‌ڵایه‌تی.