هەرێم نیوز

سەرۆکی هەڵبژێردراوی ئەمریکا رایدەگەیەنێت، کارۆلین لیڤیت وەک وتەبێژی کۆشکی سپی دەستنیشان کردووە، کە گەنجترین وتەبێژە تاوەکو ئێستا ئەو پۆستەی وەرگرتبێت.

ئەمڕۆ شەممە، دۆناڵد ترەمپ، سەرۆکی هەڵبژێردراوی ئەمریکا رایگەیاند، کارۆلین لیڤیت تەمەن 27 ساڵ وەک وتەبێژی کۆشکی سپی دەستنیشان کرد، لەکاتێکدا پێشتر وتەبێژی بانگەشەی هەڵبژاردنی کاندیدی کۆمارییەکان بوو.

ئاماژەی بەوەش کرد، "کارۆلین زیرەک و توندە و توانای پەیوەندیکردنی زۆر کاریگەریی هەیە".

ترەمپ باسی لەوەش کرد، "لیڤیت وەک وتەبێژی نیشتمانی بۆ هەڵمەتە مێژووییەکەم کارێکی ناوازەی کردووە و خۆشحاڵم رایدەگەیەنم کە لەمەودوا دەبێتە وتەبێژی کۆشکی سپی، یارمەتیدەرمان دەبێت بۆ گەیاندنی پەیامەکەمان بۆ گەلی ئەمریکا بۆ ئەوەی جارێکی دیکە ئەمریکا ببێتە نەتەوەیەکی گەورە".

کارۆلین لیڤیت-ی ته‌مه‌ن 27 ساڵان کە ئێستا وتەبێژی فەرمی قۆناغی گواستنەوەی ترەمپە، گەنجترین وتەبێژی کۆشکی سپی پێست دەبێت لە مێژودا.
پێشتر ئەو نازناوە لەلایەن ڕۆناڵد زیگلێرەوە بو کە تەمەنی 29 ساڵ بو کاتێک لە ساڵی 1969 لە ئیدارەی سەرۆک ڕیچارد نیکسۆن ئەو پۆستەی وەرگرت.

لە کۆنگرێسدا لیڤیت وەک ئەفسەری پەیوەندییەکان بۆ ئەلیس ستیفانیک کاریکردوە، کە نوێنەری ویلایەتی نیویۆرک بوە و لەلایەن ترەمپەوە بۆ پۆستی باڵیۆزی ئەمریکا لە نەتەوە یەکگرتوەکان کاندید کراوە.

لە ساڵی 2022دا لیڤیت بانگەشەیەکی لە هەڵبژاردنەکانی كۆنگرێسدا ئەنجامدا، بەو هیوایەی ببێتە نوێنەری ویلایەتی نیو هامپشایر، بەڵام دۆڕا.