ئامانجەکانی چین؟ هەلوێستی حکومەتی عیراق و ئەمریکا لە ئاستی دا چۆنن؟
و دەبێت حکومەت و دەسەلاتدارانی سیاسیی هەرێم لە هەردوو زۆن بۆ پاراستنی خەلک وکیانی هەرێمی کوردستان چ بکەن؟
هەر پاش ئەنجامدانی هێڕشەکە و تائێستا، سایتە هەوالییە سەیروسەمەرەکانی تۆڕە کۆمەلایەتییەکان (سۆشیال میدیا) و دەزگا جۆراوجۆرەکانی ڕاگەیاندنی حزبە ناتەباکان و فەریکە نووسەرانی فێسبووک، بە دەیان کۆمێنتار و شیکردنەوەیان لەم بارەیەوە بلاوکردووەتەوە. زوربەیان لە لایەن کەسانی نەشارەزا لە بوارە پەیوەستەکان بە خستنەڕووی ڕووداوەکە، کە دەبێت لەبەر ڕۆشناییان دا شڕۆڤەیەکی بابەتییانە و دروستی بۆ بکرێت. ئەم بوارانەش بریتین لە: زانستە سیاسییەکان، زانستە لەشکرییەکان، پەیوەندیی نێودەولەتیی، یاسای نێودەولەتیی، ئاسایشی نەتەوەیی وڕاگەیاندنی هۆشیار. بۆیە زوربەیان بە هەوەسی خۆیان و بێبەلگە و سەرچاوەی متمانەپێکراو و بێ توانای شێکردنەوەی واقیعیی و بەرپرسانە، وبە شێوەیەکی ساکار و بەڕووکەش لە ڕووداوەکە دواون، هەندێکیشیان لە تێنەگەیشتن بێت یان لە ڕکی کەسانێک یان لایەنێکی سیاسیی نەیار یان وەک دەسکەلای دوژمن، بەو پەیڤە وبانگەشە زیانبەخشانەی کردوویانە، پاساویان هێناوەتەوە بۆ هێڕشە کوشندەکە، بەمەش خزمەتێکی دیار و بەلاشیان، یان ناپاکانەیان بە حکومەتی ئیران و پاسدارە ئەنجامدەرەکانی هێڕشەکە کردووە!
بەهەرحاڵ، ئەم هێڕشە لەبەر ڕۆشنایی بوارە پەیوەندیدارەکان، لەڕووی واقیع و سەبارەت بە ئامانجەکانی حکومەتی ئیران لێی، چ بوو؟
کەمێک پاش دەمۆک (سعات) یازدەی شەوی دووشەم لەسەر سێشەمی (١٥ / ١٦)ی یەکەم مانگی سالی نوێ (٢٠٢٤)، بە یازدە موشەکی بالیستی، هێڕش کرایە سەر چەند شوێنێک لە شاری هەولێری پایتەختی هەرێمی کوردستان و دەوروبەری. بە ڕای پسپۆرێکی لەشکریی عیراقی، لەبەر ڕۆشنایی نزمفڕینیی و دابەزینی یەکسەر و شێوەی پێکان، کە یەکێکیان بە وردیی لە ناوەڕاستی ماڵی سەرمایەدار و وەبەرهێنەر (پێشڕەو دزەیی) دا، و چونکە ئەوەیان تەقەمەنییەکی زۆری هەلگرتبوو، بۆیە هێڕشەکە زیانی گیانیی و وێرانکارییەکی یەکجار گەورەی بە خێزان و ماڵی قوربانیی هێڕشەکە گەیاند: موشەکی کروزی مۆدێرنی ڕوسیی بووە، کە "دەولەتی روسیای فیدرال" بەسەرۆکایەتی (پۆتین) لە چوارچێوەی هاوپەیمانیی و هاوکاریی لەگەل "کۆماری ئیسلامیی ئیران" بە ڕابەرایەتی (خامنەئی) و لە بەرامبەر دڕۆنە ئیرانییەکان دژی ئۆکرانیا بە حکومەتی ئیرانی داوە. ئەم موشەکە زۆر ترسناکە، چونکە زۆر بە وردیی نیشانە دەپێکێت، لەبەرئەوەی بە ساتەلایت لە ئاسمانەوە ئاراستە و کۆنترۆل دەکرێت، بۆیە ڕێژەی هەڵەی تەنیا یەک مەترە، هەروەها تەقەمەنیەکی زۆر لەگەل خۆی هەلدەگرێت، بۆیە زۆر وێرانکەرە؛ بە پێچەوانەی ئەوانەی دیکە (فاتح ١١٠)، کە ڕەنگە تا (١٠) مەتر هەڵە بکەن لە پێکانی نیشانە، و باری تەقەمەنییەکەیان (٥٠٠) کیلۆگرامە.
پاساوی ئەم هێڕشەی میلیشیای "سوپای پاسداران"ی ڕژێمی تیۆکراتی ئیران چییە؟
کەمێک پاش ئەنجامدانی هێڕشەکە حکومەتی ئیران بە فەرمی و بێباکانە، بەرپرسیاریەتی ئەنجامدانی هێڕشەکەی لەودیو سنووری نێودەولەتیی ڕۆژهەلاتەوە گرتەئەستۆ، و شانازیشی پێوەکرد، و بانگەشەی ئەوەشی کرد گوایە بنکەیەکی دەزگای هەوالگریی "موساد"ی "ئیسرائیلیی" و چەند جێگەیەکی دیکەی مەترسیدار لەسەر "ئاسایشی نەتەوەیی ئیرانی" لە هەولێر (أربیل) مووشەکباران کردووە. و پاشان بە پاساو بۆ تەقینەوەکانی (کرمان)یشی دانا! و هەڕەشەی ئەوەشی کرد کە هێڕشەکانیان بۆ سەر هەرێمی کوردستان بەردەوام دەبن (چونکە دەزانێت هەرێمی کوردستان نە ئامراز و توانای لەشکریی وەلامدانەوەی هەیە وەک پاکستان، و نە هیچ دەولەتێکی خاوەن ئامراز و توانا بەکردەیی لەسەری دەکاتەوە، بە عیراقیشەوە). بە گوتە و بانگەشەی سەرۆک کۆماری ئیران (ئیبراهیم رەئیسی) لە ڕۆژی تەقینەوەکە لە کرمان، کردەوە تۆقێنەرەکەی کرمان دژی ئاپۆڕای یادەوەریی "تێڕور" کردنی (قاسمی سلیمانی) بوو، کە نەیهێشت "ئیسرائیلی دووەم" واتە (بوونی هەرێمی کوردستان بە دەولەتی کوردستان) بهێتەدی!
لە کاتێک دا دەسەلاتدارانی ئیران باش دەزانن کە بەرژەوەندیی ئیسرائیل و دەولەتی کوردستان نەیەکدەگرنەوە و نە لە گۆڕی دایە، چونکە هەژموونی ئیسرائیل (لە ڕێگەی لۆبی ئیسرائیلی لە ئەمریکا) بەسەر ئەمریکا لە ڕووی سیاسیی و ئابووریی و ڕاگەیاندنەوە نەک تەنیا زۆر زلە، بەلکو یەکلاکەرەوەیە، هەروەک لە لایەنگریی ڕەهای ئەمریکا بۆ ئیسرائیل (لە شەڕی غەززە و جەنگەکانی دیکەی ئیسرائیل و ولاتانی عەرەبیی دا) دەردەکەوێت. بەلام هەر ئیران بوو لە ڕسواییەکەی "ووتەرگێتی – ئیران / کۆنترا" سەردەمی نیکسۆن لە کاتی جەنگی عیراق- ئیران دەرکەوت، چەکی لە ئیسرائیلەوە بۆدەهات. هەر مووسادی ئیسرائیلی بوو سەرۆکی پارتی کرێکارانی کوردستانی (عبداللە ئۆجەلان)ی بەفێڵ گرت و لە فرۆکەخانەی پایتەختی کینیا ڕادەستی گروپێکی میتی تورکیی هەماهەنگ بۆ ئەم مەبەستە کرد. ئەگەر ئیسرائیل رۆژێک، لە ڕۆژان لەکاتی تەنگانە، چەند پارچە چەکێکی کۆن یان بەس بەزارەکی پشتیوانی لە دۆزی کورد لە کوردستانی عیراق کردبێت، تەنیا کردەیەکی تاکتیکی ڕووت بووە بە مەبەستی کورتمەودا. دەسەلاتدارانی ئیران باش دەزانن ئەگەر ئیسرائیل بە جیددی هاوکار و پشتیوانی کورد بوا، شۆڕشی ئەیلول بە تەدبیری کێسنجەر لە سالی (١٩٧٥) لە بەرژەوەندی ئیسرائیل تێکنەدەدرا. ئەگەر ئیسرائیل پشتیوانی ڕاستینەی گەلی کورد بوا، لەمێژ بوو دەولەتی کوردستان دادەمەزرا و ئیرانیش ئاوا بە ئاسانی و بێباکانە نەیدەتوانی موشەک بارانی بکات. جگە لەوەی ئەم پاساوە بێ بەڵگە و بێ بنەمایە، وەک پێشینانی کورد گوتەنی نیشانەی ئەوەیە: "بە کەرێ ناوێرێت، بەردەبیتە کورتانی".
بە پێی بنەماکانی یاسای نێودەولەتیی: ئەگەر دەولەتێک هاولاتییەک یان لایەنێک لە دەولەتێکی دیکە بە هەر تۆمەتێک تۆمەتباربکات، دەبێت داوا لە حکومەتی ئەو دەولەتە بکات تا لێکۆلینەوە و لێپێچینەوەی لەگەل بکات، بەتایبەتی ئەگەر دوو دەولەتەکە دۆست بن و ڕێککەوتنی ئاسایشی لە نێوانیان دا هەبێت؛ و بە هیچ شێوەیەک حکومەتی دەولەتی یەکەم بۆی نییە بەخۆی کارە بکات و بگرە بە سووکیش سزای تۆمەتبار لە دەولەتەکەی دیکە بدات، نەخاسما بە موشەکی بالستی تۆمەتبار لەناوببات و ماڵی وێران بکات، ولەوەش نەسلەمێتەوە کە ژن و مندالە بێتاوانەکانیشی بەم شێوەیە تۆقێنەرە دڕندانەیە بکوژێت و بەسەختی برینداریان بکات، پاشانیش شانازی بەکردەوەکەی بکات، وەک ئەوەی کارێکی چاک و کردارێکی پەسەندی دژی بنکەیەکی ئەمریکا یان ئیسرائیل، کردبێت؛ لەکاتێکدا ئیسرائیل پەیتاپەیتا بەرپرسە لەشکریی و پاسدارییەکانیان لە سوریا و پسپۆڕە ئەتۆمییەکانیان لەناو جەرگەی تاران دەکوژێت.
جگە لە پێوەری یاسایی، بە پێی هەموو پێوەرێکی ئاینیی و مرۆڤایەتیی و ڕەوشتیش لەناوبردنی سەرو ماڵی خێزانێک بەتەواوی و بێویژدانانە، تاوانە دژی مرۆڤایەتیی، وکردەوەیەکی تیڕۆڕیستییە پڕ بە مانای "تێڕۆری دەولەت"، و دوژمنکارییەکی ئاشکرایە و پێچەوانەی ڕێنماییە ئایینیە پارێزەرەکانی مرۆڤی بێسووچە، و کردەوەیەکی پێچەوانەی بەها ڕەوشتییەکانە و پێشیلکردنی ئاشکرای سەروەریی دەولەتی دووەمە و دژی ئاسایشی نەتەوەیی و ڕێسای دراوسێیەتییە. بۆیە تاوانێکی گەورە و پاساوهەلنەگرە، و جێگەی شەرمەزاریی و سەرکۆنەکردن و ناڕەزایی گشت مرۆڤێکی هۆشیار و خاوەن ویژدانە، لەسەرانسەری کوردستان و گشت جیهان.
دەسەلاتدارانی ئیران دەلێن: کوشتنی قاسمی سلێمانی لە لایەن حکومەتی ئەمریکا بە دڕۆن لە ولاتی سێیەم (عیراق) تێڕۆرە و تاوانی ترامپە دژی کۆچکردوو؛ هەروەها دوژمنکارییە دژی کۆماری ئیران، وپێشیلکردنی یاسای نێودەولەتییە؛ لە کاتێک دا حکومەتی ئەمریکا قاسمی سلێمانی لە دەرەوی ماڵەکەی خۆی و بێ ئەزیەتدانی ژن و مندالەکانی و بێ وێرانکردنی ماڵەکەی کوشت. کەچی حکومەتی ئیران بە ڕاکێتی مۆدێرن و بە شێوەیەکی زۆر خراپتر، دەستی لە کوشتنی ژن و مندالی ساوای پێشڕەو دزەییش نەپاراست (بە ژینای یەکسالیشەوە)! ئەدی باشە ئاغای خامنەئی و ئاغای رەئیسی و ئاغای قائانی چ ناوێک لەم کردەوەیەیان دەنێن؟ لە کاتێکدا ئەوان دەولەتەکەی خۆیان بە "کۆماری ئیسلامی" ناودەبەن، و دەولەتی ئەمریکاش بە "شیطان بزرگ" دادەنێن! ئایا بانێکە و دوو هەوا؟ یان ئەوەی بۆ حکومەتی ئەمریکا حەڕامە، زیانبەخشتریش بۆ حکومەتی ئیران حەڵالە؟
ئامانجەکانی رژێمی ئیران لەم هێڕشە کوشندەیە و وێرانکەرە بۆسەر هەرێم چین؟
- ئامانجی سەرەکی ڕژێمی تیۆکراتی ئیران لەم دوژمنکارییە ئاشکرایە دژی هەرێمی کوردستان: ناچارکردنی هەرێمە بە وازهێنان لە هاوپەیمانیی و هاوکاریی لەگەل ولاتە یەکگرتووەکانی ئەمریکا، کە ڕژێمی ئیران بە گەورەترین دوژمنی خۆی لە جیهان دایدەنێت، بە: ڕاوەستان لەگەل لایەن و میلیشیا حەشدییە شیعییە هاوپەیمان و هاوکارەکانی لە عیراق بۆ فشارکردنە سەر ئەمریکا (بە هەموو شێوەیەک)، بۆ دەرچوون لە هەموو عیراق و داخستنی هەردوو بنکەکانیان لە هەرێم و گرتنی ڕێڕەویان بۆ کوردستانی سوریا لە سەر سنووری هەرێم؛ لە کاتێک دا باش دەزانن کە ولاتەیەکگرتووەکانی ئەمریکا و هاوپەیمانانی ڕۆژئاوایی جەنگی دووەمی کەنداو بناخەی هەرێمیان واتە "پەناگەی ئارام"یان لە سالی (١٩٩١) دامەزراند، و ئەو پەناگەیەش لە سالی (١٩٩٢) لە ڕێگەی هەلبژاردنەوە پەرەیسەندوو بوو بە (هەرێمی کوردستان – عیراق / بەپێی ئەمری واقیع)، و لە سالی (٢٠٠٥)یش، هەر بە پشتیوانی وان لە دەستووری عیراق جێگیرکرا و شێوەی یاسایی وەرگرت، و وەک یەکەم هەرێم لە دەولەتی بەناو ئیتیحادی و بە واقیع مەرکەزی عیراق جێگیرکرا؛ و هەر لە (١٩٩١وە تا ٢٠٠٣) لەلایەن ئەمریکا پارێزراوە و یارمەتی لەشکریی و ماددی پێدەدریت، و تا ئێستاش ئەم یارمەتییە بەردەوامە، بەلام وەک جاران لە دوژمنکاریی دوژمنانی ناپارێزرێت. (لە ئێستادا بە هۆی ناتەبایی دەسترۆیشتووان لە هەردوو زۆنی هەرێم وناکاراییان لە زانست و هونەری سیاسەت و ئیدارە، هەلپەسێردراوە، و هەرێم کەوتووەتە ژێر ڕەحمەتی هەردوو رژێمی ئیران و تورکیا و شاگردە بێدەسەلات و بێسەروەرییەکانی ئاغای خامنەئی لە بەغداد).
- ئامانجی دووەمی ڕژێمی ئیران لەم دوژمنکارییە: سەپاندنی هەژموونیەتی بەتەواوی بەسەر هەموو دەولەتی عیراق (هەر هەژدە پارێزگاکان) بە گشتیی و بەسەر گشت ناوچەکانی هەردوو زۆنی هەرێمی کوردستان، بەتایبەتیی، بۆ ئەوەی لە پلانی کۆنترۆلکردنی سوریا و لوبنانیش، لەم ڕێگەیەوە – بە شنگالەوە (وەک ڕێڕەوی پێکبەستنەوەی ئیران بەهەر سێ دەولەت تا دەریای سپی ناوەڕاست) سەربکەوێت و بە کردەیی ببێتە زلهێزێکی هەرێمیی بێ کێبرکێکار (ڕکابەر).
- ئامانجی سێیەمی ڕژیمی ئیران لەم دوژمنکارییە: گورزوەشاندنی ڕاستەوخۆیە لە ژیان و سەقامگیریی و ماڵ و مولکی خەلک و ئاسایشی نیشتمانیی و ئابووریی و ئاوەدانکردنەوە و ژێرخان و قەوارەی کیانی هەرێمی کوردستان – لە شێوەی گورزە بچووکترەکان بۆ سەر کێلگەی گازی کۆرمور لە قادرکەرەم بە شێوەیەکی ناڕاستەوخۆ لە لایەن میلیشیای "الحشد الشعبي". بەلام لێرە بە بەکارهێنانی هێز و توندوتیژیی بەشێوەیەکی ڕاستەوخۆ و تۆقێنەر، بە نیازی سەختترکردنی ژیان و گوزەرانی خەلکی هەرێم و وەرسکردنیان بەتەواوی لە دەسەلاتی دووپارچە و ناتەباو و بێ بودجە و گیرۆدەی بۆشایی یاسایی هەرێم؛ شانبەشانی فشار وڕێکارە سیاسیی و یاسایی و داراییە ناڕاستەوخۆکانی لە ڕێگەی دامودەزگاکانی حکومەتی عیراق و باسکە چەکدارە وەلائییەکانی بە کاتیۆشا و درۆنی، هەر ئەو خۆی بۆیان دابیندەکات و دەنێرێت و سەرپەرشتییان دەکات بۆ لێدانی ژیان و گوزەران و ئاسایش و سەقامگیریی و ئابووریی هەرێمی کوردستان، کە هەر لەیەکەم ڕۆژی دامەزراندنیەوە وەک دۆست و هاوپەیمانی دوژمن و ڕکابەری گەورەیان (ولاتە یەکگرتووەکانی ئەمریکا) سەیر و چاودێریی دەکەن و وەک هەر سێ دەولەتە داگیرکەر و دابەشکەرەکانی دیکەی کوردستان (تورکیا و سوریا و عیراق) لێی کەوتونەتە بۆسە، بۆ ئەوەی بەتەوای لاوازی بکەن و پەراوێزی بکەن و بەرەبەرە لەناوی ببەن.
هەلوێستی حکومەتی عیراق ( ئیدارەی سودانی) و حکومەتی ئەمریکا (ئیدارەی بایدن) چۆن بوو لە ئاست ئەم دوژمنکارییەی حکومەتی ئیران دژی هەرێمی کوردستان؟
هەرچەندە حکومەتی ئێستای عیراق، سەبارەت بەم دوژمنکارییە، تاڕادەیەک باشتر لە جارانی پێشووتر، هاتە دەنگ و سکاڵای لەسەر ئیران ئاڕاستەی نەتەوەیەکگرتووەکان کرد (وهەرچەندە ڕەنگە هەمان سەنگ و کارتێکردنی سفری سکالاکەی دژی دوژمنکارییەکانی تورکیا هەبێت، چونکە بە جیددی بەدوای دا ناچێت)، بەلام بەکردەیی کەمتەرخەمە، چونکە بەرامبەر حکومەتی ئیران بێدەسەلات و بێ سەروەرییە. ئەگەرنا دەبوایە بە پێی بڕگەی (١)ی ماددەی بیست وهەشتەمی "ڕێککەوتنی چوارچێوەی ستراتیجی ئاسایشیی عیراقی ئەمریکی (٢٠٠٨)"، مادام خۆی هێز و توانای بەرپەرچدانەوەی نییە، داوا لە حکومەتی ئەمریکا بکات، کە بەرامبەر بەم هێڕشە موشەکییە بالستییە، کە هۆکاری کوشتن و وێرانکردنی ماڵی هاولاتیانیەتی، و هەڕەشەیەکی جیددیە لەسەر ئاسایشی نیشتمانیی دەولەتی عیراق و پێشیلکارییەکی زەقی سەروەریی هەرێم و هەموو دەولەتی عیراقە، بە شێوەیەکی گونجاو و ڕێگریکەر (منسجم و رادع) وەلام بداتەوە. بەلام دیارە واینەکرد. ئەدی کەواتە سوودی ڕێککەوتنەکە، بەتایبەتی بۆ پاراستنی ژیان و ئاسایشی خەلکی هەرێمی کوردستان چییە؟
سەبارەت بە هەلوێستی حکومەتی ئەمریکاش، هەرچەندە ئاخفتنکارانی حکومەتی ئەمریکا (ئیدارەی جۆ بایدن) بە فەرمی بەزارەکیی سەرکۆنەی هێڕشەکەیان کرد، بەڵام لەهەمان کات دا ڕایانگەیاند کە "بنکەو و هاولاتیانیان لەم هێڕشەدا زیانیان بەرنەکەوتووە"؛ ئەمەش ڕێک وەک ئەوە وایە پێشینان لەم بارەیەوە گوتویانە: " لە منی نەدا، لە حەمەدی برای دا، لە من وایە لە جۆڕکی کای دا".
لە واقیعدا ئەم هەلوێستە، نەک تەنیا زۆر لاواز و سەیرە، بەلکو نائومێدکەر و نابەرپرسانەشە، چونکە جگە لە ڕێککەوتنی ئاسایشیی نێوان حکومەتی ئەمریکا و حکومەتی عیراق، سەبارەت بە هەر دوژمنکارییەک بەرامبەر هەر شوێن و دەزگایەکی سەرانسەری عیراق، ئەمریکا دوو بنکە و ڕێڕەویکی نێودەولەتیی گرنگ و پێگەیەکی جیۆپۆلەتیکی ستراتیجیی لە هەرێمی کوردستان دا هەن. حکومەتی ئەمریکا باشیش دەزانێت کە ئەم دوژمنکارییە ڕاستەوخۆیە و هەموو کردە تێڕۆرستییە ناڕاستەوخۆیەکانی گروپە وەلائییەکانی حەشدی شەعبی فشارن بۆ دەرکردنی ئەمریکا لە هەرێم و عیراق. ئەگەر ئیدارەی بایدن لە هەرێمی کوردستان و عیراق و سوریا لەژێر ئەو فشارانەی رژێمی ئیران و شاگردەکانی بکشێتەوە واتە شکستبهێنێت، ئەوا ئەو سێ شکستەش دەچنە پاڵ شکستەکانی لە شەڕی غەززە و جەنگی ئۆکرانیا؛ و بەمە جۆ بایدن سەرکەشییەکی گەورە دەکات، نەک تەنیا بە ئایندەی سیاسیی خۆی و دەرفەتی دەرچوونی حزبی دیموکرات لە هەلبژاردنەکانی کۆتایی ئەمسال، بەلکو سیاسەت و ستراتیجیەت و بەرژەوەندییەکانی ولاتە یەکگرتووەکانی ئەمریکاش لە ڕۆژهەلاتی ناوەڕاست تووشی گەورەترین زیان دەکات، لە ئێستا و داهاتوو.
سەبارەت بە ئەرکی حکومەت و سەرکردایەتی سیاسی هەردوو حزبی دەسەلاتدار لە هەردوو زۆنی هەرێم، لەم کاتەدا کە خەلک و کیانی هەرێم لە سێ لاوە، لەلایەن حکومەتەکانی ئیران و تورکیا و عیراق دەوەرەدراون و فشاری دارایی و دەڕوونیی و هێڕشی لەشکری چڕ و کوشندەیان دەکرێنە سەر: دەبێت حکومەت و سیاسەتداران و دەسەلاتدارانی هەرێمی کوردستان تا کار لەکار نەترازاوە، بەکردەیی و بەپەلە بە سیاسەت و ئیدارەدان و پاڕادیپلۆماسییەتی خۆیان دابچنەوە، چونکە مەرجە بنەڕەتییەکانی خۆڕاگرتنی گەلی هەرێم و مانی کیانی هەرێم لەم ڕەوشە دژوارە بریتین لە: (١)- تەبایی سیاسیی ڕاستی سەرکردایەتی هەردوو حزبی دەسەلاتدار لە هەردوو زۆنی هەرێم و لە ناوچە کوردستانییە دابڕێندراوەکانە – پێش هەمووان لە پارێزگای کەرکوک؛ و (٢)- دەستکردنە بە چاکسازیی ئیداریی و ئابووریی بە کردەیی، لە ئەمرۆوە و بەشێوەیەکی هەستپێکراو، دوور لە دروشم و بەلێنی سواو.
ئەگەرنا: ڕەوشی دژواری هەرێم، بەهۆی (أ)- نیگەرانیی پونگاوەی واقیعی سەختی ژیان و گوزەرانی خەلک، و (ب)- مەترسیی زریانی پیلان و هێڕشی لەشکریی تێکدەر و داگیرکارانەی سێقۆلیی ئیران و تورکیا و حەشدییە عیراقییە (ئیرانییە) بەڕەللاکان و فشارە دارایی و یاسایی وسیاسییەکانی حکومەتی عیراق، و(ج)- کردەوە تێڕۆرستییە زۆربووەکانی جاسوسەکانیان (کەسەر بە ئیتیلاعات و میتن) و پروپاگاندە چەواشەکەرانە و دووبەرەکیی هاندەرانەی بەکرێگیراوانیان: هەڕەشەیەکی جیددییان لەسەر ژیان و گوزەران و سەقامگیریی و ئایندەی خەلکی هەرێمی کوردستان و مانی قەوارەی هەرێمی کوردستان دروستکردووە، و خستوویانەتە نێو لەپی دێو. ئەوجا "ئەمە ئەرز و ئەمەش گەز".
لەڕاستیدا، ئەم ڕەوشە دژوارە نە بە لێدوان و نە بە سەرکۆنەکردنی ڕووت چارەسەر دەکرێت. تەنیا ڕێگەی چارەسەریی واتە ئامرازی پاراستنی ژیان و گوزەران و ئاسایش و سەقامگیریی و ئایندەی خەلک و کیانی هەرێمی کوردستان بریتییە لە: تەبایی سیاسیی سەرکردایەتی هەردوو حزبی حوکمران کە بە کۆبوونەوەیەکی خێرا و جیددی دەستپێبکات، و ڕاگەیاندنی یەک سیاسەتی ناوخۆ و دەرەوە و ستراتیجیەتێکی پتەو و پیادەکردنی پاڕادپلۆماسییەتی گونجاو لە لایەن حکومەتە هاوبەندییەکەیان، و دەستکردن بە چاکسازیی ئیداریی و ئابووریی بەکردەیی لە ئەمرۆوە.