هەرێم نیوز
ڕۆژنامەی ئەمریکیی "ئاکسیۆس" وردەکاریی پێشنیازێکی نوێی قەتەری بۆ گەیشتن بە ڕێککەوتنێک لە ماوەی دوو ڕۆژدا لە نێوان ئەمریکا و ئێران ئاشکرا کرد، ئەمەش لە کاتێکدایە کە واشنتۆن سەرەڕای هەوڵە دیپلۆماسییەکان، بژاردەی سەربازیش بە کراوەیی بهێڵێتەوە.
وردەکاریی پلانی دوو ڕۆژەی قەتەر
بەپێی ڕاپۆرتی ئاکسیۆس، نێوەندگیرە قەتەرییەکان خشتەیەکی زمانیی دوو قۆناغیان خستووەتە ڕوو بە ئامانجی دروستکردنی متمانە و خۆشکردنی زەمینە بۆ دانوستانێکی بەرفراوانتر:
•رۆژی یەکەم: ئەمریکا گەمارۆی دەریایی لەسەر ئێران هەڵدەگرێت و بەشێک لە پارە بلووککراوەکانی تاران ئازاد دەکات. لە بەرامبەردا، تاران بە فەرمی ئاژانسی نێودەوڵەتیی وزەی ئه‌تۆم بانگهێشت دەکات بۆ ئەوەی پشکێنەرەکانی ڕەوانەی ئەو دامەزراوە ئەتۆمییانە بکات کە پێشتر بۆردومان کراون، لەسەر بنەمای ئەو ڕێککەوتنەی کە ساڵێک پێش ئێستا لە قاهیرە ئەنجام درابوو.
•رۆژی دووەم: گەرووی هورمز بەڕووی جووڵەی کەشتیوانیدا دەکرێتەوە، و دواتر دانوستانە ئەتۆمییەکانی نێوان واشنتۆن و تاران دەست پێ دەکەنەوە و سەرنج لەسەر ئەمبارەکانی یۆرانیۆمی بەرزپیتێنراوی ئێران دەبێت.
سەرەڕای ئەم پێشنیازە، ئێران هێز و مەرجەکانی خۆی هەیە و جەخت لەسەر جێبەجێکردنی حەوت مەرجەکەی دەکاتەوە، لەوانە هەڵگرتنی تەواوی گەمارۆکان، ئازادکردنی پارەکان و پێدانی قەرەبووی جەنگ، پێش ئەوەی هیچ گفتوگۆیەکی ئەتۆمی قبووڵ بکات.
ترەمپ و هەڵسەنگاندنی بژاردەکان
ئاشکراکردنی ئەم پێشنیازە لە کاتێکدایە که دۆناڵد ترەمپ، سەرۆکی ئەمریکا، لەگەڵ گەورە ڕاوێژکارەکانی ئاسایشی نەتەوەیی کۆ بووەوە. ترەمپ لە کۆشکی سپی بە ڕۆژنامەوانانی ڕاگەیاند، بە زوویی لەبارەی دەستپێکردنەوەی پرۆسە سەربازییەکان دژ بە ئێران بڕیار دەدات، و ئاماژەی بەوە کرد کە پێی باشە خۆی بە دوور بگرێت لە وێرانکاریی زیاتر، بەڵام بژاردەی لێدانی سەربازیی بە کراوەیی هێشتووەتەوە.
بەپێی زانیارییەکانی ئاکسیۆس، ئیدارەی ئەمریکا لە ئێستادا سێ بژاردەی سەرەکی تاوتوێ دەکات:
١. دەستپێکردنەوەی هێرشە سەربازییەکان.
٢. بەردەوامیدان بە فشاری ئابووری بۆ سەر تاران.
٣. گەیشتن بە ڕێککەوتنێکی دیپلۆماسی کە هەردوولا سازشی تێدا بکەن.
سەرەڕای ئەوەی فەرماندەییی ناوەندیی ئەمریکا (سێنتکۆم) ئامادەکارییەکانی دەست پێ کردووە، بەڵام تاوەکو ئێستا هیچ فەرمانێکی فەرمی بۆ دەستپێکردنی جەنگ لە واشنتۆنەوە نەدراوە.