ھەرێم نیوز

هەڵبژاردنەکانی ناوەڕاستی کۆنگرێسی ئەمریکا لە کاتێکدا بەڕێوە دەچن کە داهاتووی سیاسیی دۆناڵد ترامپ، ئاڕاستەی جەنگی ئێران و پەیوەندییەکانی واشنتن لەگەڵ هاوپەیمانان و وڵاتانی جیهان، بوونەتە بابەتی سەرەکی و چەقی شیکردنەوەی میدیا دیارەکانی جیهان.

ئەم پرۆسەیە تەنها ململانێیەک نییە بۆ کۆنترۆڵکردنی بڕیار لە کۆنگرێسدا، بەڵکو تاقیکردنەوەیەکی یەکلاکەرەوەیە بۆ مانۆڕە سیاسی و دەرەکییەکانی سەرۆکی ئەمریکا.

ئیندەپەندەنت؛ ئەگەری توندبوونەوەی سیاسەتەکانی ترامپ:
ڕۆژنامەی بەریتانیایی «ئیندەپەندەنت» لە وتارێکی شیکارییدا هۆشداری دەدات کە ئەگەر کۆماریخوازەکان لەم هەڵبژاردنەدا شکستێکی گەورە بهێنن، ئەگەری ئەوە هەیە دۆناڵد ترامپ لە ماوەی بەردەوامیی دەسەڵاتەکەیدا سیاسەتێکی توندتر و مەترسیدارتر پەیڕەو بکات.

بە گوتەی سام کێلی، نووسەری وتارەکە، دوای ئەم هەڵبژاردنانە فشارە ناوخۆییەکانی هەڵبژاردن لەسەر ترامپ کەمتر دەبنەوە؛ ئەمەش وای لێ دەکات لە ناوچەکانی وەکو ئۆکرانیا، تایوان، کوبا و ئێران هەڵسوکەوتێکی توندتر بنوێنێت و ناکۆکییەکانی واشنتن لەگەڵ ئەورووپا و هاوپەیمانانی ناتۆش قووڵتر ببنەوە.

گاردین؛ شکستی کۆنگرێس و بەردەوامیی ڕەوتی ترامپیزم:
لە بەرامبەردا، ڕۆژنامەی «گاردین» لە وتارێکدا بە ناونیشانی «ئایا ئەمە کۆتایی سەردەمی ترامپە؟ نەک بەو ئەندازەیەی کە چاوەڕوان دەکرێت»، جەخت لەوە دەکاتەوە کە تەنانەت ئەگەر دیموکراتەکان سەرکەوتنی گەورەش بەدەست بهێنن، کاریگەریی سیاسیی ترامپ بە ئاسانی کۆتایی نایەت.

نەسرین مالک دەنووسێت کە ترامپ گۆڕانکارییەکی بنەڕەتی لە دامەزراوەکانی ئەمریکادا دروست کردووە و نەبوونی بەرنامەیەکی ڕوونی سیاسی لەلایەن دیموکراتەکانەوە وای لێ دەکات کە شکستی ئەگەریی کۆماریخوازەکان تەنها پاشەکشەیەکی کاتی بێت، نەک کۆتاییهاتن بە ڕەوتی ناسراو بە «ترامپیزم».

واشنتن پۆست؛ جی دی ڤانس و قۆناغی داهاتووی کۆماریخوازان:
لە لایەکی تریشەوە، ڕۆژنامەی «واشنتن پۆست» سەرنجی خستووەتە سەر جووڵە سیاسییەکانی جی دی ڤانس، جێگری سەرۆکی ئەمریکا، و هەوڵەکانی بۆ دروستکردنی ناسنامەیەکی سیاسیی سەربەخۆ.

بەپێی شیکاریی ناتالی ئەلیسۆن، ڤانس لە کۆبوونەوەکاندا ڕووبەڕووی دروشمی پشتیوانانی دەبێتەوە بۆ خۆپاڵاوتنی لە هەڵبژاردنی سەرۆکایەتیی ٢٠٢٨. ناوبراو تا ئێستا لە ڕەخنەگرتنی ڕاستەوخۆ لە ترامپ خۆی پاراستووە، بەڵام لە چەند بۆنەیەکدا نەرمی بەرامبەر پرسه هەستیارەکان وەک دۆخی ئابووری و جەنگی ئێران نیشان داوە.

دەرئەنجام:
کۆی ئەم هەڵسەنگاندنانە دەریدەخەن که دەرئەنجامی هەڵبژاردنی ناوەڕاستی کۆنگرێس وەک کلیلێک وایە بۆ قۆناغی داهاتووی ئەمریکا؛ پرسیاری سەرەکی ئەوەیە کە ئایا شکستی کۆماریخوازەکان دەبێتە سەرەتای پاشەکشەی نفوزی ترامپ، یان بە پێچەوانەوە، دەرفەتێک بۆ توندترکردنی سیاسەتەکانی و سەرهەڵدانی سەرکردەی نوێ وەک جی دی ڤانس لە ئاقاری پێشبڕکێی ٢٠٢٨دا؟