هەرێم نیوز

لە پەراوێزی کردنەوەی حەوتەمین پێشانگەی نێودەوڵەتیی تەکنەلۆجیای هایتێکس لە شاری هەولێر، مەسرور بارزانی، سەرۆکی حکوومەتی هەرێمی کوردستان، لە لێدوانێکی ڕۆژنامەوانیدا داوای لە لایەنە سیاسییەکان کرد، بە زووییی بێ پاشەکشە پەرلەمانی کوردستان کارا بکەنەوە و دووپاتی کردەوە، ئەمە ئەرک و بەرپرسیاریەتییەکی نیشتمانییە بەرامبەر دەنگدەران.

پەیامی سەرۆکی حکوومەت لە پێشانگەی هایتێکس
ئەمڕۆ سێشەممە، ٦ی تشرینی یەکەمی ٢٠٢٦، مەسرور بارزانی، سەرۆکی حکوومەتی هەرێمی کوردستان، دوای کردنەوەی پێشانگەی تەکنەلۆجیای هایتێکس (HITEX)، لە لێدوانێکدا بۆ میدیاکان پەیامێکی ئاراستەی هێز و لایەنە براوەکانی هەڵبژاردن کرد و گوتی: "کاراکردنەوەی پەرلەمان بەرپرسیاریەتییەکی نیشتمانیی ئەو کەسانەیە کە خەڵک دەنگی پێ داون، بۆیە پێویستە ئەوانیش هەست بەو بەرپرسیاریەتییە بکەن و وەفایان بۆ ئەو متمانە و دەنگە هەبێت کە پێیان دراوە."

پەرلەمان؛ دەزگای شەرعیی یاسادانان و چاودێری
سەرۆکی حکوومەت دووپاتی کردەوە، پەرلەمان دەزگایەکی شەرعی و نیشتمانیی گرنگە بۆ یاسادانان و چاودێریکردنی کارەکانی دەسەڵاتی جێبەجێکردن.

سەرۆکی حکوومەت ڕایگەیاند، ناکرێت لەوە زیاتر هەنگاوەکانی دەستبەکاربوون و کاراکردنەوەی پەرلەمان دوا بخرێت، بەڵکوو دەبێت لایەنەکان بەرژەوەندیی گشتیی گەلی کوردستان لە سەرووی هەموو شتێکەوە دابنێن.