هەرێم نیوز
بەیانیی ئەمڕۆ دووشەممە ٧ی ئەیلوولی ٢٠٢٦، نێچیرڤان بارزانی، سەرۆکی هەرێمی کوردستان، پێشوازیی لە سەید عەممار ئەلحەکیم، سەرۆکی ڕەوتی حیکمەی نیشتمانی و شاندێکی یاوەری کرد.
کێشەکانی هەولێر و بەغدا و پشتیوانیی حکوومەت
لە دیدارێکدا، بارودۆخی گشتیی عێراق و هەرێمی کوردستان تاوتوێ کرا و هەردوولا جەختیان لەسەر گرنگیی بەردەوامیی کارکردن بۆ بەرەوپێشبردنی پەیوەندییەکانی نێوان هەولێر و بەغدا و چارەسەرکردنی کێشە هەڵپەسێردراوەکان لە ڕێگەی دیالۆگ و لێکتێگەیشتنەوە کردەوە.
هەروەها سەرۆکی هەرێم و سەرۆکی ڕەوتی حیکمە پشتیوانیی خۆیان بۆ حکوومەتی فیدراڵی لەپێناو سەرخستنی ئەرک و کارنامەکەیدا دووپات کردەوە.
بەرپەرچدانەوەی ئاڵۆزییەکان و پێشهاتەکانی ناوچەکە
بارودۆخی ناوچەکە و دوایین پێشهات و لێکەوتەکانی، تەوەرێکی دیکەی دیدارەکە بوو و هەردوولا بیروڕایان لەبارەیەوە ئاڵوگۆڕ کرد و جەختیان لە ڕاگرتنی هاوسەنگی و ئارامی لە ناوچەکەدا کردەوە.