هەرێم نیوز
بەشی پۆلیسی نەهێشتنی تاوانی گەرمیان لە چوارچێوەی هەڵمەتەکانی بۆ ڕووبەڕووبوونەوەی تاوانە ئەلیکترۆنییەکان، تۆمەتبارێکیان دەستگیر کرد کە لە ڕێگەی چەندین هەژماری ساختەوە هەڕەشەی بڵاوکردنەوەی وێنە و ڤیدیۆی تایبەتی لە ئافرەتان کردبوو.
وتەبێژی پۆلیسی گەرمیان ڕایگەیاند، تۆمەتبارەکە ناوی (ا - د)ـیە و تەمەنی ٢١ ساڵە و دانیشتووی شاری کەلارە.
دوای لێکۆڵینەوە و پشکنینی مۆبایلەکەی، دەرکەوتووە شەش هەژماری جیاوازی لە تۆڕەکانی تیک تۆک و سناپ چات بۆ مەبەستی هەڕەشەکردن و بڵاوکردنەوەی وێنە و ڤیدیۆی تایبەتیی ئافرەتان بەکار هێناوە.
پۆلیسی گەرمیان ئاماژەی بەوەش کردووە کە تۆمەتبارەکە لە ئێستادا بەپێی مادەی ٢ لە یاسای خراپبەکارهێنانی ئامێرەکانی پەیوەندیکردن ڕاگیراوە و پەڕاوی لێکۆڵینەوەی بۆ کراوەتەوە. هاوکات داوا لە هەموو ئەو هاووڵاتییانە دەکرێت کە سکاڵایان لەسەر ئەو هەژمارانە هەیە، سەردانی بەشی پۆلیسی نەهێشتنی تاوانی گەرمیان بکەن بۆ تۆمارکردنی سکاڵای یاسایی.