هەرێم نیوز
گوتەبێژی حکوومەتی عێراق ڕایگەیاند، لە ٣٠ـی ئەیلوولی ئەمساڵدا ئەرکی هاوپەیمانیی نێودەوڵەتی کۆتایی دێت، هاوکات جەختی لەسەر کۆنترۆڵکردنی چەک بەدەست دەوڵەتەوە و پێشکەوتنەکانی ڕووبەڕووبوونەوەی گەندەڵی کردەوە.
کۆتاییهاتنی ئەرکی هاوپەیمانان و پرسی دەستپاکی
ئەمڕۆ دووشەممە، ٣١ـی ئابی ٢٠٢٦، حەیدەر عەبوودی، گوتەبێژی حکوومەتی عێراق لە لێدوانێکدا بۆ ئاژانسی هەواڵی عێراق (واع) ڕایگەیاند، دۆسیەی ڕووبەڕووبوونەوەی گەندەڵی چەندین پێوەری سەرەکیی بەدەستهێناوە کە لە دوای ساڵی ٢٠٠٣ـوە تاوەکو ئێستا هاوشێوەی نەبووە.
سەبارەت بە سەروەریی نیشتمانیش ڕوونی کردەوە، حکوومەت چاوەڕوانی ٣٠ـی ئەیلوولی داهاتوو دەکات، چونکە دەبێتە پێوەرێکی گرنگی سەروەری بۆ دەوڵەت و گەلی عێراق و لەو وادەیەدا کۆتایی بە بوونی نێردەی هاوپەیمانیی نێودەوڵەتی لەسەر خاکی عێراق دێت.
کۆنترۆڵکردنی چەک بەدەست دەوڵەتەوە
لە بەشێکی دیکەی قسەکانیدا گوتەبێژی حکوومەت ئاماژەی بەوە کرد، دۆسیەی کۆنترۆڵکردنی چەک بەدەست دەوڵەتەوە لە پێشینەی کارەکانی حکوومەتە لە نێو کارنامەی وەزاریدا.
ئەو ڕێکارانەی حکوومەت لەم دۆسیەیەدا جێبەجێیان دەکات، گەڕانەوەیە بۆ بنەما دەستوورییەکان، چونکە دەستوور دروستکردنی هەر گرووپێکی چەکداری لە دەرەوەی هێزە ئەمنییە فەرمییەکان بە تەواوی قەدەغە کردووە.
پاشخانی کشانەوەی هێزەکان و بەرەنگاربوونەوەی گەندەڵی
لە ماوەی ڕابردوودا حکوومەتی عێراق گفتوگۆکانی لەگەڵ ئەمریکا و هاوپەیمانیی نێودەوڵەتی چڕ کردەوە بۆ کۆتاییهێنان بە بوونی هێزە بیانییەکان. بەپێی ڕێککەوتنەکان، ڕۆژی ٣٠ـی ئەیلوولی ٢٠٢٦ وەک دوا مۆڵەت بۆ کشانەوەی تەواوەتی هێزەکانی هاوپەیمانان دیاری کرا و پرۆسەکەش دەستی پێکردووە، بە جۆرێک هێزەکانی ئەڵمانیا لەم مانگەدا بە تەواوی لە عێراق و هەرێمی کوردستان کشاونەتەوە.
لە لایەکی دیکەوە، یەکێک لە بەڵێنەکانی سەرۆک وەزیرانی عێراق نەهێشتنی چەکی بێمۆڵەت و ڕووبەڕووبوونەوەی ئەو گرووپە چەکدارانە بوو کە لە دەرەوەی دەسەڵاتی دەوڵەت کار دەکەن. هاوکات دەستەی دەستپاکی بەردەوامە لە ئاشکراکردنی دۆسیەکانی گەندەڵی و تا ئێستا چەندین بەرپرسی باڵا بە تۆمەتی بەهەدەردانی سامانی گشتی دەستگیر کراون.