هەرێم نیوز
بەڕێوەبەرایەتیی نەوت و کانزاکانی هەولێر بڕیارێکی نوێی لەبارەی نۆرەگرتنی پێشوەختە بۆ وەرگرتنی بەنزین دەرکرد و هۆشداریی توند دەداتە شۆفێران کە تووشی سزای دارایی دەبنەوە.
قەدەغەکردنی ڕاگرتنی ئۆتۆمبێل لە پێش بەنزینخانەکان
ئەمڕۆ یەکشەممە، ٣٠ـی ئابی ٢٠٢٦، بەڕێوەبەرایەتیی نەوت و کانزاکانی هەولێر ئاگادارییەکی ئاراستەی گشت هاووڵاتییان و شۆفێران کرد.
لە ئاگادارییەکەدا ڕاگەیەندراوە، ڕاگرتنی ئۆتۆمبێل لە پێش بەنزینخانەکان، شەقام و کۆڵانەکان بە مەبەستی نۆرەگرتن ڕۆژێک پێش دابەشکردنی بەنزین بە هەموو شێوەیەک قەدەغەیە.
جەختیش کراوەتەوە کە ئەم بڕیارە بەتایبەتی بۆ کاتەکانی شەوان دەبێت، بە ئامانجی ڕێگریکردن لە دروستبوونی قەرەباڵغی و بێزارکردنی هاووڵاتییان.
تۆمارکردنی سزای هاتووچۆ بۆ سەرپێچیکاران
بەڕێوەبەرایەتییەکە هۆشداریی توندی داوەتە شۆفێران و ڕوونی کردووەتەوە، لە حالەتی جێبەجێ نەکردنی ئەم بڕیارەدا، ژمارەی ئۆتۆمبێلەکان لەلایەن تیمەکانی بەڕێوەبەرایەتیی هاتووچۆوە تۆمار دەکرێن و سزای پێبژاردنی داراییان بۆ دەنووسرێت.
پاشخانی دروستبوونی دیاردەکە
ماوەیەکە حکوومەتی هەرێمی کوردستان بەنزینی پاڵپشتیکراو لە شاری هەولێر دابەش دەکات، بەهۆی کەمیی نرخەکەی بەراورد بە بەنزینی بازرگانی، قەرەباڵغییەکی زۆر لە بەردەم بنکەکانی دابەشکردن دروست دەبێت.
ئەمەش وای کردووە بەشێک لە شۆفێران بۆ مسۆگەرکردنی نۆرەکانیان، لە نیوەشەودا یان ڕۆژێک پێشتر ئۆتۆمبێلەکانیان لە شەقام و کۆڵانەکان بپاربکەن. ئەم دیاردەیە جگە لە تێکدانی سیمای شار، بووەتە هۆی دروستبوونی ئاستەنگی هاتووچۆ و بێزارکردنی دانیشتووانی ناوچەکە، بەو هۆیەوە لایەنە پەیوەندیدارەکان ڕێکاری یاسایی و سزای داراییان بەسەر سەرپێچیکاراندا سەپاند.