هەرێم نیوز
سوپای یەمەن ڕایدەگەیەنێت کە بەرپەرچی شەپۆلێک هێرشی مووشەکی و درۆنیی حوسییەکانیان بۆ سەر شاری مۆخا داوەتەوە، کە بەهۆی ئەو هێرشانەوە دەیان کەس بوونەتە قوربانی.
قوربانییەکان و شوێنی هێرشەکان
ئەمڕۆ دووشەممە ١٠ی ئابی ساڵی ٢٠٢٦، عەمید ماجد عەبدوڵا نزیلی، وتەبێژی فەرمیی هێزە چەکدارەکانی یەمەن لە ڕاگەیەندراوێکدا ئاشکرای کرد، حوسییەکان هێرشێکی فراوانیان کردووەتە سەر بەندەری مۆخا، چەندین ناوچەی نیشتەجێبوون و وێستگەی بەرهەمهێنانی ئاو و کارەبا.
بەپێی ئامارە پزیشکییە سەرەتاییەکان، لەم هێرشانەدا ٧ کەس کوژراون و ٣٠ کەسی دیکەش بریندار بوون، کە زۆربەیان خەڵکی مەدەنی و کارمەندی دامەزراوە خزمەتگوزارییەکانن.
تێکشکاندنی مووشەک و درۆنەکان
سەرچاوە سەربازییەکانی یەمەن ئاماژەیان بەوە کردووە کە حوسییەکان ٣٠ مووشەکی بالیستییان ئاراستەی ناوەندە مەدەنییەکان و نەخۆشخانەکانی شاری مۆخا کردووە؛ هاوکات سیستمی بەرگریی ئاسمانیی یەمەن توانیویەتی ١١ درۆنی حوسییەکان بەر لە گەیشتن بە ئامانجەکانیان لە ئاسماندا تێكبشکێنێت.
تەقینەوە و ئاڵۆزییەکان لە کاتێکدایە کە پێکدادانەکان لە بەرەکانی جەنگ لە پارێزگاکانی تەعز و زالـع ڕوویان لە زیادبوون کردووە. شاری مۆخا بەهۆی هەڵکەوتەی جوگرافیی و نزیکی لە گەرووی ستراتیژیی بابولمەندەب بایەخێکی زۆری هەیە و ڕووداوەکان ئاماژە بە هەوڵی بەردەوامی حوسییەکان دەدەن بۆ تێکدانی ئاسایشی کەشتیوانی لە ناوچەکەدا.