هەرێم نیوز
وەزارەتی سامانە سروشتییەکانی حکومەتی هەرێمی کوردستان لە بەیاننامەیەکی فەرمیدا نرخە نوێیەکانی هەموو جۆرەکانی بەنزینی دیاری کرد و تەواوی بەنزینخانەکانیشی بەرامبەر بە کوالێتیی سووتەمەنییەکە ئاگادار کردەوە.
دیاریکردنی نرخەکان بۆ جۆرەکانی بەنزین
ئەمڕۆ چوارشەممە ٢٢ی تەمووزی ٢٠٢٦، وەزارەتی سامانە سروشتییەکان بە مەبەستی ڕێکخستنەوەی بازاڕ و کەمکردنەوەی بارگرانی لەسەر شانی هاووڵاتییان، ڕێنمایی و نرخەکانی بەم شێوەیە ڕاگەیاند:
بەنزینی نۆڕماڵ (حکومی): نرخی فرۆشتنی لیتری بەنزینی پاڵپشتیکراوی وەزارەتی سامانە سروشتییەکان بە کوالێتیی نۆڕماڵ لە بەنزینخانەکاندا بە ٧٥٠ دینار دیاری کرا.
بەنزینی نۆڕماڵ (بازرگانی): نرخی فرۆشتنی بەنزینی بازرگانی بە کوالێتیی نۆڕماڵ لە بەنزینخانەکان نابێت لە ٨٥٠ دینار زیاتر بێت بۆ هەر لیترێک.
بەنزینی موحەسەن: نرخی فرۆشتنی یەک لیتر بەنزینی کوالێتی موحەسەن لە بەنزینخانەکاندا نابێت لە ١٠٠٠ دینار زیاتر بێت.
بەنزینی سۆپەر: نرخی فرۆشتنی یەک لیتر بەنزینی کوالێتی سۆپەر لە بەنزینخانەکاندا نابێت لە ١٢٠٠ دینار زیاتر بێت.
پابەندبوون بە کوالێتی و ڕێنماییەکان
لە بەشی کۆتایی ڕاگەیەندراوەکەدا، وەزارەتی سامانە سروشتییەکان جەختی لەسەر توندکردنەوەی چاودێرییەکان کردووەتەوە و ڕایگەیاندووە، پێویستە کوالێتیی سەرجەم جۆرەکانی بەنزین (نۆڕماڵ، موحەسەن و سۆپەر) بە گوێرەی مەرج و ڕێنماییە فەرمییەکانی وەزارەت بێت و هەر بەنزینخانەیەک سەرپێچی بڕیارەکان یان کوالێتی بکات، ڕووبەڕووی ڕێکاری یاسایی توند دەبێتەوە.