هەرێم نیوز
لە چوارچێوەی هەوڵە بەردەوامەکانی کابینەی نۆیەم بۆ بووژانەوەی ژێرخانی سەرچاوەکانی ئاو و گەیاندنی خزمەتگوزاری بە گوندەکان، پڕۆژەیەکی گەورە و مێژوویی ئاو لە دەڤەری بارزان خرایە گەڕ.
تەواوکردنی پڕۆژەکە لەسەر ڕووباری ئاڤا شین
ئەمڕۆ یەکشەممە ١٩ی تەممووزی ٢٠٢٦، حكوومەتی هەرێمی كوردستان بە فەرمی ڕایگەیاند، لە پێناو دابینكردنی ئاوی پاكی خواردنەوە و بەهێزكردنی كەرتی خزمەتگوزاری لە ناوچە جیاوازەکاندا، پڕۆژەی ستراتیجیی ئاوی ٥٣ گوندی دەڤەری بارزان لەسەر ڕووباری "ئاڤا شین" بە سەركەوتوویی تەواو كرا.
ئەم پڕۆژە موژدەبەخشە بە گوژمەی ١٣٨ ملیار و ٥٠٠ ملیۆن دینار، بە تەواوەتی لەلایەن کۆمپانیا و دەستی كاری ناوخۆییەوە جێبەجێ كراوە، ئەمەش نیشانەی متمانەی تەواوی حكوومەت و توانای بەرزی كەرتی ناوخۆیە لە ڕاپەڕاندنی پڕۆژە ستراتیجی و نیشتمانییەکاندا. پڕۆژەکە ئاوی پاكی خواردنەوە بە پێوەری نێودەوڵەتی بۆ زیاتر لە ٣٥ هەزار هاووڵاتی لە ٥٣ گوندی ناوچەكە دابین دەكات و ئاسایشی ئاو لە تەواوی دەڤەرەكەدا دەستەبەر دەكات.
تایبەتمەندییە تەكنیكییەکانی پڕۆژەکە
ئەم پڕۆژە بنەڕەتییە خاوەنی تایبەتمەندییەكی تەكنیكیی بەرزە و بە پێشکەوتووترین شێواز دیزاین کراوە، کە پێکهاتووە لە:
توانای بەرهەمهێنان: پڕۆژەکە توانای پاڵاوتن و بەرهەمهێنانی ١٢٠٠ مەتر سێجا ئاوی پاكی لە یەک کاتژمێردا هەیە، کە هاوتایە بە بەرزترین پێوەرە نێودەوڵەتییەکان.
تۆڕی گواستنەوە: ئاوەكە لە ڕێگەی تۆڕێكی فراوان و مۆدێرنی گواستنەوە، بەدرێژایی ٥٤٠ كیلۆمەتر دەگەیەنرێتە ناو قووڵایی سەرجەم گوندەکان.
كۆگەكانی ئاو: پڕۆژەكە لە پێنج كۆگەی گەورەی سەرەکی و ٥٤ كۆگەی بچووك پێکهاتووە، كە ئەركی وەرگرتن و دابەشكردنی دادپەروەرانەی ئاوەکە بەسەر ماڵاندا ڕێكدەخەن.
پەرەپێدانی ئابووری و ڕێگریکردن لە کۆچ
بەرپرسانی کەرتی ئاو ئاماژە بەوە دەکەن، تەواوکردنی ئەم کارە گەورەیە دەبێتە هۆی بەخشینی دڵنیایی بە گوندنشینان بۆ مانەوە لە زێدی باوک و باپیرانیان و ڕێگریی لە کۆچکردنیان بەرەو شارەکان دەکات. هاوكات زەوینەیەكی یەکجار لەبار دەرەخسێنێت بۆ ئەوەی هاووڵاتییانی دەڤەرەكە زیاتر گرنگی بە سێكتەرە گرنگەكانی كشتوكاڵ و ئاژەڵداری بدەن، ئەمەش لە کۆتاییدا پاڵپشتییەک و بووژانەوەیەکی گەورە بۆ سێکتەری ئابووریی هەرێمی کوردستان فەراهەم دەکات.