هەرێم نیوز
سەرەڕای هۆشدارییە نێودەوڵەتییەکان، پێکدادانی سەربازیی ڕاستەوخۆ لە نێوان واشنتۆن و تاران قۆناغێکی مەترسیدارتری بڕیوە و سوپای پاسدارانی ئێران بۆردومانکردنی چەندین بنکەی تری ستراتیژیی ئەمریکای لە ناوچەکەدا ڕاگەیاند.
قۆناغی دووەمی هێرشەکان؛ پێکان لە ئوردن، کوێت و بەحرەین
ئەمڕۆ دووشەممە ١٣ی تەممووزی ٢٠٢٦، ئاژانسی هەواڵی فەرمیی ئێران (ئیرنا) لە زاری سوپای پاسدارانەوە بڵاویکردەوە، لە وەڵامی هێرشەکانی ئەمریکا بۆ سەر کەناراوەکانی وڵاتەکەی، "قۆناغی دووەم"ی ئۆپەراسیۆنە سەربازییەکانی دەستپێکردووە. بەپێی ڕاگەیەندراوەکە، هێزەکانی ئێران بە موشەک و فڕۆکەی بێفڕۆکەوان، بنکەی ئاسمانیی "شازادە حەسەن" لە ئوردن، بنکەی ئاسمانیی "شێخ عیسا" و ناوەندی فەرماندەیی درۆنەکانی ئەمریکایان لە بەحرەین، لەگەڵ بنکەی ئاسمانیی "عەلی سالم" لە کوێت بۆردومان کردووە. سوپای پاسداران بانگەشەی ئەوە دەکات کە هێرشەکەی سەر ئوردن بووەتە هۆی ئاگرکەوتنەوە لە تانکی سوتەمەنی و کۆگاکانی تەقەمەنی، و جەختیشی کردووەتەوە کە ئۆپەراسیۆنەکانیان هێشتا بەردەوامن.
هاوتەریب لەگەڵ ئەمەشدا، سوپای پاسداران ئاشکرای کرد کە شەوی ڕابردوو هێزە دەریاییەکانیان لە گەرووی هورمز دەستیان بەسەر دوو کەشتیی بازرگانیدا گرتووە بەو پاساوەی کە سیستەمی شوێنپێهەڵگرتنیان کوژاندووەتەوە و ڕێنماییە دەریاییەکانیان پێشێل کردووە، بەڵام هیچ زانیارییەکی لەسەر ناسنامە و ڕەگەزنامەی کەشتییەکان ئاشکرا نەکرد.
حاڵەتی ئامادەباشی لە وڵاتانی عەرەبی و خستنەخوارەوەی موشەکەکان
پاش ڕاگەیەندراوەکەی ئێران، وەزارەتی ناوخۆی بەحرەین بۆ دووەمجار لە ماوەی ٢٤ کاتژمێردا زەنگی ئاگادارکردنەوەی لێدا و داوای لە هاوڵاتیانی کرد دەستبەجێ بچنە حەشارگە و شوێنە سەلامەتەکان؛ دەسەڵاتدارانی مەنامە ڕایانگەیاند کە بەرگریی ئاسمانیی وڵاتەکە خەریکی بەرپەرچدانەوەی هێرشەکانە.
لەلایەکی دیکەوە، سوپای کوێت بڵاویکردەوە کە ڕووبەڕووی چەند ئامانجێکی ئاسمانیی دوژمنکارانە بووەتەوە و دەنگی تەقینەوەکان نیشانەی تێکشکاندنی ئەو ئامانجانە بووە لە ئاسماندا. هاوکات سوپای ئوردن بە فەرمی دووپاتی کردەوە کە چوار موشەکی بالیستی کە لە خاکی ئێرانەوە بەرەو بنکە ئەمریکییەکان هەڵدرابوون، لە ئاسمانی وڵاتەکەیدا تێکشکاندووە و خستوونیەتە خوارەوە، و ڕێکخراوی هەواڵی "پێترا"ش دەڵێت ڕووداوەکە هیچ زیانێکی گیانی لێنەکەوتووەتەوە.
پاشخانی ململانێکان و هۆشداریی نەتەوە یەکگرتووەکان
ئەم پەرەسەندنە توندە تەنها چەند کاتژمێرێک دوای ئەوە دێت کە فەرماندەیی ناوەندیی ئەمریکا (سێنتکۆم) ڕایگەیاندبوو لە شەپۆلێکی نوێی هێرشەکانیدا بۆ یەکەمجار سیستەمی بەرگریی ئامانی، ڕادارەکانی کەنار دەریا و دەیان سەکۆی موشەکیی ناوخۆی ئێرانی پەکخستووە. سێنتکۆم پێشتر هۆشداری دابوو کە گەرووی هورمز ڕێڕەوێکی نێودەوڵەتییە و لە ژێر کۆنترۆڵی ئێراندا نییە.
لەگەڵ بەردەوامیی ئەم پێکدادانە چەکدارییە ڕاستەوخۆیانە و بەرزبوونەوەی زەنگی مەترسی، نەتەوە یەکگرتووەکان هۆشدارییەکی توندی بڵاوکردەوە و ڕایگەیاند، گەڕانەوەی ناوچەکە بۆ شەڕێکی تەواو و کراوە، کاردانەوە و لێکەوتەی مرۆیی و ئابووریی یەکجار قورسی بۆ تەواوی جیهان دەبێت، و داوای هێورکردنەوەی دەستبەجێی دۆخەکەی کرد.