هەرێم نیوز

دۆناڵد ترەمپ، سەرۆکی ئەمریکا بە ئاکسیۆسی ڕاگەیاندووە کە بنیامین نەتەنیاهۆ، سەرۆک وەزیرانی ئیسرائیل داوای کۆبوونەوەیەکی لە کۆشکی سپی لێ کردووە، ئەگەری هەیە ئەم کۆبوونەوەیە لە هەفتەی داهاتوو یان دوای گەڕانەوەی ترەمپ لە لوتکەی ناتۆ لە تورکیا ئەنجام بدرێت. 

ترەمپ لە لێدوانێکی کورتدا بە گاڵتەجاڕییەوە وتی: "پەیوەندیمان زۆر باشە، بەڵام نەتەنیاهۆ دەزانێت کێ سەرۆکە."

ئەمە دەبێتە یەکەم کۆبوونەوەی نێوان هەردوو سەرکردە لەدوای کۆبوونەوە دراماتیکییەکەی مانگی شوبات لە "ژووری ئۆپەراسیۆنەکان" (Situation Room)، کە تێیدا نەتەنیاهۆ پلانی جەنگی هاوبەشی دژ بە ئێرانی پێشکەش کردبوو.

 لەو کاتەوە، ناکۆکییەکانی نێوان ترەمپ و نەتەنیاهۆ لەسەر ئامانجە سیاسی و ئەمنییەکان، بەتایبەت لەسەر دۆسیەی ئێران و جەنگی لوبنان زیاتر بووە. 

سەرچاوەیەکی حکوومی ئەمریکی ئاماژەی بەوە کردووە کە ڕاوێژکارانی ترەمپ زۆر بێزارن لە نەتەنیاهۆ و پێیان وایە لە هەموو هەنگاوەکانی جەنگدا "هەڵەی کردووە."

لە لایەکی دیکەوە، ترەمپ ئاشکرای کرد کە بە وردی چاودێریی مەراسیمی بەخاکسپاردنی عەلی خامنەیی، ڕابەری پێشووی ئێران دەکات. 

ترەمپ بە ئاکسیۆسی وت: "ئێرانییەکان دەپاڕێنەوە بۆ ئەوەی ڕێککەوتن بکەن، بەڵام بڕیارمان دا بۆ ماوەی هەفتەیەک دانوستانەکان ڕابگرین تا مەراسیمەکانی پرسە کۆتایی دێت." 

ترەمپ سەبارەت بەو مەراسیمە وتی: "سەیرە دەبینم هەندێک لە ئێرانییەکان دەگرین، پێم وایە خەڵک ڕقیان لە خامنەیی بوو، لەوانەیە فرمێسکی ساختە بێت."

سەرەڕای ناکۆکییەکان، ترەمپ مانگی ڕابردوو یاداشتنامەی لێکتێگەیشتنی بۆ درێژکردنەوەی ئاگربەست لەگەڵ ئێران واژۆ کرد و دەستی بە دانوستانی نوێی ناوکی کرد. 

هەروەها گوشاری لەسەر نەتەنیاهۆ دروست کردووە کە ئۆپەراسیۆنەکانی ئیسرائیل لە لوبنان سنووردار بکات، بەو پێیەی ئەو شەڕانە بوونەتە ئاستەنگ لەبەردەم دانوستانەکانی ئێران.

 ئەم کۆبوونەوەیە بۆ نەتەنیاهۆ زۆر گرنگە، چونکە لە قۆناغی بانگەشەی هەڵبژاردنەکانی ئۆکتۆبەردایە و ڕاپرسییەکان نیشان دەدەن کە جەماوەری بەراورد بە ڕکابەرەکانی ڕووی لە کەمبوونەوە کردووە.