هەرێم نیوز
سەرۆکایەتیی هەرێمی کوردستان دەرەنجام و ناوەڕۆکی سەردانە فەرمییەکەی شاندی باڵای هەرێمی بۆ کۆماری ئیسلامیی ئێران ئاشکرا کرد، و تیشکی خستە سەر هەڵوێستی نەگۆڕی هەولێر بەرامبەر بە هاوکێشە ئەمنی و ناوخۆییەکان.
سەردانی تاران و دووپاتکردنەوەی بێلایەنی
ئەمڕۆ هەینی ٣ی تەممووزی ٢٠٢٦، دڵشاد شەهاب، گوتەبێژی سەرۆکایەتیی هەرێمی کوردستان، دوای گەڕانەوەی شاندی باڵای هەرێم لە تاران، کۆنگرەیەکی ڕۆژنامەوانیی ئەنجامدا. ئەم سەردانەی شاندی هەرێم بۆ تاران بە مەبەستی بەشداریکردنی فەرمی بوو لە ڕێوڕەسمی سەرەخۆشیی عەلی خامنەیی، ڕێبەری کۆچکردووی ئەو وڵاتە.
دڵشاد شەهاب ڕایگەیاند، نێچیرڤان بارزانی، سەرۆکی هەرێمی کوردستان لەسەر بانگهێشتنامەیەکی فەرمی سەردانی ئێرانی کردووە و چەندین کۆبوونەوەی گرنگی لەگەڵ سەرۆک کۆمار، سەرۆکی پەرلەمان و وەزیری دەرەوەی ئەو وڵاتە ئەنجامداوە.
گوتەبێژی سەرۆکایەتیی هەرێم سەبارەت بە ناوەڕۆکی گفتوگۆکان وتی: "ئێمە هەڵوێستی ڕوون و فەرمیی هەرێمی کوردستانمان بۆ بێلایەنبوون لە جەنگ و ململانێکانی ئەم دواییەی ناوچەکە دووپات کردووەتەوە. سەرۆکایەتیی هەرێم هەموو هەوڵێکی دا بۆ پاراستنی بێلایەنیی نیشتمانیی هەرێم؛ هەرچەندە لەم جەنگەدا قوربانی و زیانمان بەرکەوت، بەڵام بەهۆی سیاسەتە هاوسەنگەکانمانەوە توانیمان بە سەرکەوتوویی تێپەڕین." ئاشکراشی کرد کە ئەم بێلایەنییە حەکیمانەیە، لە لایەن بەشداربووانی جەنگەکە و هێزەکانی تریشەوە بە تەواوی ڕێزلێگیراو بووە.
پشتیوانیکردنی دیالۆگی ئەمریکا و ئێران
پرسی دانوستانەکانی نێوان واشنتن و تاران بۆ کۆتاییهێنان بە جەنگی ناوچەکە، تەوەرێکی سەرەککی کۆبوونەوەکانی شاندی هەرێم بوو.
ئاماژەی بەوە کرد، نێچیرڤان بارزانی پشتیوانیی خۆی بۆ گرتنەبەری ڕێگەی دیالۆگ و دانوستان دووپات کردووەتەوە و جەختی کردووەتەوە کە هەرێمی کوردستان هەرگیز نابێتە سەرچاوەی هەڕەشە بۆ سەر هیچ کام لە دراوسێکانی. باسی لەوەش کرد کە پەرەپێدانی پەیوەندییە دوو قۆڵییەکانی نێوان هەولێر و تاران تەوەرێکی دیکە بووە و سەرکردەکانی ئێرانیش لای خۆیانەوە گرنگیی پەرەپێدانی پەیوەندییەکانیان لەگەڵ هەرێم دووپات کردووەتەوە.
وتیشی: "پێشوازیی زۆر گەرم و گرنگیپێدانی بەرپرسانی تاران بە سەرۆکی هەرێمی کوردستان لە نێو ئەو خشتە قەرەباڵغەی کە بەهۆی پرسەکەوە هەیانبوو، نیشانەیەکی ڕوونی پێگە و گرنگیی مێژوویی و ناوچەیی هەرێمی کوردستانە لە کایەی دیپلۆماسیدا."
دۆخی ناوخۆ و کاراکردنەوەی پەرلەمان
لە وەڵامی پرسیاری ڕۆژنامەنووساندا سەبارەت بە دۆخی ناوخۆی هەرێمی کوردستان، دڵشاد شەهاب ئەو دەنگۆیانەی ڕەتکردەوە کە باس لە مەترسی لەسەر قەوارەی هەرێم دەکەن و گوتی: "پێگەی سیاسی و دیپلۆماسیی هەرێمی کوردستان هێشتا زۆر بەهێزە. ڕاستە کێشە ناوخۆییەکان کاریگەرییان هەیە، بەڵام هەرێمی کوردستان لە مەترسیدا نییە و کێشە سیاسییەکان هەرگیز نابنە سەرچاوەی هەڕەشە لەسەر پێگەی دەستووریی هەرێم."
سەبارەت بە کاراکردنەوەی پەرلەمانی کوردستان، دڵشاد شەهاب ڕایگەیاند: "خەڵکی کوردستان و وڵاتانی هاوپەیمانیش چاویان لەوەیە کە پەرلەمان کارا بکەینەوە، چونکە ئەم بابەتە ڕێکارە یاساییەکانی زۆر دواکەوتووە و کاراکردنەوەی پەرلەمان مافێکی سەرەتایی، فەرمی و دەستووریی گەلی کوردستانە" و پێویستە لایەنەکان هەنگاوی خێرای بۆ بنێن.