هەرێم نیوز

دۆناڵد ترەمپ، سەرۆکی ئەمریکا، لە پەیامێکی نوێدا لە تۆڕی کۆمەڵایەتی "ترووس سۆشیاڵ" رایگەیاند کە ویلایەتە یەکگرتووەکان خەریکی لەناوبردنی تەواوەتی رژێمی کۆماری ئیسلامیی ئێرانە لە رووی سەربازی، ئابووری و هەموو بوارەکانی دیکەوە.

ترەمپ رەخنەی توندی لە رووماڵی میدیاکان، بە تایبەت رۆژنامەی "نیویۆرک تایمز" گرت و وتی ئەگەر راپۆرتەکانی ئەو میدیایە بخوێنرێتەوە، رەنگە وا هەست بکرێت ئەمریکا لەم جەنگەدا سەرکەوتوو نییە. ناوبراو جەختی کردەوە کە هێزی دەریایی ئێران لەناوچووە و هێزی ئاسمانی ئەو وڵاتەش چیتر بوونی نەماوە.

بە وتەی چل و حەوتەمین سەرۆک کۆماری ئەمریکا، مووشەک، فڕۆکەی بێفڕۆکەوان و هەموو تواناکانی دیکەی سەربازی ئێران لە حاڵەتی لەناوبردندان و سەرکردەکانی ئێرانیش "لە لاپەڕەی رۆژگار سڕاونەتەوە".

ترەمپ ئاماژەی بەوە کرد کە ئەمریکا خاوەنی هێزێکی ئاگرینی بێوێنە، تەقەمەنی بێسنوور و کاتی پێویستە بۆ کۆتاییهێنان بەم کارە. وتیشی: "سەیری ئەوە بکەن ئەمڕۆ چی بەسەر ئەو کەسە شێت و نزمەکاندا دێت."

لە کۆتایی پەیامەکەیدا، ترەمپ باسی لەوە کرد کە بەرپرسانی ئێران  لە ماوەی 47 ساڵی رابردوودا لە سەرانسەری جیهان خەڵکی بێتاوانیان کوشتووە، وتی: "ئێستا من وەک سەرۆکی ئەمریکا خەریکی لەناوبردنیانم و جێبەجێکردنی ئەم ئەرکە شانازییەکی گەورەیە بۆ من."