هەرێم نیوز
بە ئامادەبوونی محەممەد شیاع سودانی، سەرۆک وەزیرانی عێراق، دوو ڕێککەوتنی سەرەتایی گرنگ لە نێوان کۆمپانیا نەوتییەکانی عێراق و کۆمپانیای شیڤرۆنی ئەمەریکی بۆ پەرەپێدانی چەند کێڵگەیەکی نەوتی واژۆ کران.
ئەمڕۆ دووشەممە 23ی شوباتی 2026، نووسینگەی ڕاگەیاندنی سەرۆک وەزیرانی عێراق بڵاوی کردەوە، ڕێککەوتنی یەکەم لە نێوان کۆمپانیای نەوتی بەسرە و شیڤرۆنی ئەمەریکییە بۆ گواستنەوەی بەڕێوەبردنی کێڵگەی (ڕۆژئاوای قورنە/2). ڕێککەوتنی دووەمیش لەگەڵ کۆمپانیاکانی نەوتی زیقار و باکوورە، بە مەبەستی پەرەپێدانی کێڵگەی ناسرییە و چوار ناوچەی گەڕان لە پارێزگای زیقار، سەرباری پەرەپێدانی کێڵگەی بەلەد لە پارێزگای سەڵاحەدین.
مەراسیمی واژۆکردنەکە بە ئامادەبوونی تۆم باراک، نێردەی تایبەتی ئەمەریکا بۆ سووریا و جۆشوا هاریس، بەرپرسی کاروباری باڵیۆزخانەی ئەمەریکا بەڕێوە چوو. لە میانەی مەراسیمەکەدا، سودانی جەختی لە گرنگیی ئەم ڕێککەوتنانە کردەوە بۆ تەواوکردنی چاکسازییەکانی کەرتی نەوت و کاریگەرییە ئەرێنییەکانی لەسەر بەرزکردنەوەی ئاستی ئابووری و بژێویی دانیشتووانی پارێزگاکانی زیقار و سەڵاحەدین.
لە بەشێکی دیکەی ڕاگەیەندراوەکەدا هاتووە کە کۆمپانیای نەوتی بەسرە و (لوک ئۆیڵ)ی ڕووسی ڕێککەوتنێکی یەکلاکردنەوەیان واژۆ کردووە بۆ گواستنەوەی کاتیی گرێبەستەکە بۆ کۆمپانیای نەوتی بەسرە و پاکتاوکردنی شایستە داراییەکانی نێوانیان. دواتر بەپێی ڕێککەوتنێکی چوارچێوەیی، گرێبەستەکە لە نەوتی بەسرەوە دەدرێتە شیڤرۆن، ئەمەش دوای تەواوبوونی دانوستانەکان و ڕێککەوتن لەسەر خاڵەکانی گرێبەستە نوێیەکە، بەپێی ڕێککەوتنەکەش شیڤرۆنی ئەمەریکی بۆ ماوەی یەک ساڵ مافی قۆرخکاریی دانوستانی دەبێت.