هەرێم نیوز
لیژنەی باڵای بینینی مانگ لە هەرێمی کوردستان، بە فەرمی ڕایگەیاند کە سبەی چوارشەممە، یەکەم رۆژی مانگی پیرۆزی رەمەزان دەبێت.
بەگوێرەی ڕاگەیەندراوێکی فەرمی وەزارەتی ئەوقاف و کاروباری ئایینی، کە ئەمشەو سێشەممە (١٧ی شوباتی ٢٠٢٦) بڵاوکرایەوە، لیژنەی باڵای بینینی مانگ بە هەماهەنگی لەگەڵ لیژنە لاوەکییەکان لە پارێزگا و ئیدارە سەربەخۆکانی هەرێمی کوردستان کۆبووەتەوە و پاش پشتڕاستکردنەوەی بینینی مانگ لە ئاسمانی کوردستان، بڕیاردرا سبەی چوارشەممە بکرێتە یەکەم رۆژی مانگی رەمەزان.
لە ڕاگەیەندراوەکەدا هاتووە:
"بە پشتبەستن بە بەڵگەکان دەرکەوتووە کە مانگ لە ئاسمانی هەرێمی کوردستان بینراوە، بۆیە رۆژی چوارشەممە رێکەوتی ١٨ی شوباتی ٢٠٢٦، یەکەم رۆژی مانگی پیرۆزی رەمەزان دەبێت لە هەرێمی کوردستان."
وەزارەتی ئەوقاف و کاروباری ئایینی، وێڕای پیرۆزبایی لە موسڵمانانی کوردستان و جیهان، هیوای خواست ئەم مانگە ببێتە مایەی خێر و خۆشی و سەقامگیری بۆ خەڵکی کوردستان.
