هەرێم نیوز
وتەبێژی پۆلیسی گەرمیان رایدەگەیەنێت، لەسەر روداوەکەی دوێنێ پێنج کەس دەستگیرکراون.
رائید سەربەرز عومەر وتەبێژی پۆلیسی گەرمیان روونیکردەوە، لەو پێنج کەسە؛ سێ کەسیان لەلایەن هێزەکانەوە دەستگیرکراون و دوو کەسەکەی دیکەشیان خۆیان رادەست کردووە.
ئەمەش لە کاتێکدایە، دوێنێ بەڕێوەبەرایەتى پۆلیسى گەرمیان لەڕاگەیێنراوێکدا لەبارەى روداوەکەوە رایگەیاند،رۆژی هەینی، لەسەر ڕێگای گوندی "خاڵە بەگ" لە سنووری قەزای ڕزگاری، شەڕ و پێکدادان لەنێوان دوو لایەن کە خزمی یەکترن دروستبوو. هۆکاری شەڕەکە بۆ کێشەیەکی کۆنی زەوی و زار دەگەڕێتەوە.
ئاماژەی بەوەشدا، لە ئەنجامی ڕووداوەکەدا، چوار کەس لە لایەکیان کوژراون کە سێیان بران و ئەوەی دیکەشیان ئامۆزایانە، هەروەها برایەکی دیکەی کوژراوەکان بریندارە، لە لایەنی بەرامبەریش شەش کەسی دیکە بریندار بوون، بەهۆی سەختی برینەکانیانەوە، شەش لە بریندارەکان ڕەوانەی نەخۆشخانەکانی سلێمانی کراون.