هەرێم نیوز
وەزارەتی ناوخۆی هەرێم ڕایگەیاند، ڕوداوەكەی ئەمڕۆ نزیك پاڵاوگەی لاناز درێژكراوەی پیلانی چەند دەستێکی دەرەکیە ، بە فیتی هەندێک کەس و لایەنی ناوخۆیی، هەوڵی نانەوەی ئاژاوە دەدرێت. دەشڵێت، "كەسێك لە ڕوداوەكاندا گیانی لەدەستداوە و چیتر رێگە نادەین سود لە نیازپاکیی دامو دەزگاکانی هەرێمی کوردستان وەربگیرێت و سنورێک بۆ ئەو کارە تێکدەرانە دادەندرێت".
وەزارەتی ناوخۆی حکومەتی هەرێمی کوردستان ئەمشەو لە ڕاگەیەندراوێكدا بڵاویكردەوە، ماوەیەکە لە لایەن چەند دەستێکی دەرەکی و بە فیتی هەندێک کەس و لایەنی ناوخۆیی، هەوڵی نانەوەی ئاژاوە دەدرێت. نوێترین هەوڵی تێکدەرانە بە بەئامانجگرتنی کێڵگەی غازی کۆرمۆر دەستی پێکرد کە مەبەست لێی راگرتنی بەرهەمهێنانی کارەبای هەرێم بوە.
ئاماژەی بەوەشكرد، دوای ئەوەش حکومەتی هەرێمی کوردستان سوتەمەنیی شلی وەک جێگرەوەی غاز بۆ دابین کردنی کارەبا بەکارهێنا، بە هاندانی ناوخۆیی و دەرەکی، کۆمەڵە کەسێکی ئاژاوەگێڕ رێگای تانکەرەکانی گواستنەوەی سوتەمەنی و هاوڵاتیانیان لە سنوری گوێڕ گرت و تەقەیان بە سەر خەڵک و رێبوارانی ئەو رێگایەدا کرد.
وەزارەتی ناوخۆ لەبارەی قوربانییەكانەوە باسی لەوەكردوە، "لە ئەنجامی تەقەی ئەو کەسانەدا هاوڵاتییەک بوە قوربانی و گیانی لە دەستدا و ژمارەیەک کەسی تریش برینداربون".
دەشڵێت، چیتر رێگە نادەین سود لە نیازپاکیی دامو دەزگاکانی هەرێمی کوردستان وەربگیرێت و سنورێک بۆ ئەو کارە تێکدەرانە دادەندرێت. بۆ راگرتنی ئەو جۆرە ئاژاوەگێڕییانە، بە پێی یاسا بەرکارەکان لە هەرێمی کوردستان مامەڵە لەگەڵ کەسانی ئاژاوەگێڕ دەکرێت و کەس لە سەروی یاسا نیە.