هەرێم نیوز

ناوەندی لێکۆڵینەوەی Hudsonـی ئەمریکی لە ڕاپۆرتێکی نوێدا ئاماژە بەوە دەکات کە سوپای پاسدارانی ئێران بە مەترسیدارترین قۆناغی مێژووی خۆیدا تێدەپەڕێت.

زنجیرەیەک شکست لە مەیدانی جەنگ و زانیارییە هەواڵگرییەکان، دەریخستووە کە هەژموونی ناوچەیی و هێزی بەرپەرچدانەوەی تاران لە بەرامبەر ئۆپەراسیۆنە سەربازییەکانی ئەمریکادا بە تەواوەتی پاشەکشەی کردووە.

شکستی تەکنەلۆژی و هەواڵگری ڕاپۆرتەکە ئاماژە بە ئۆپەراسیۆنی ڕزگارکردنی سەربازە ئەمریکییەکە لە ناوچە شاخاوییەکانی باشووری ڕۆژئاوای ئێران دەکات وەک بەڵگەیەک بۆ بوونی کونی گەورە لە سیستەمی چاودێری و هەواڵگریی ئێراندا.

ئەم شکستە دەریدەخات کە سوپای پاسداران نەیتوانیوە پارێزگاری لە "دەستکەوتێکی پڕوپاگەندەیی" بکات، ئەمەش باڵادەستیی هێزە تایبەتەکانی ئەمریکا و بێسوودیی ئەو سیستەمە چاودێرییانە دەسەلمێنێت کە تاران و پەکین ملیاران دۆلاریان تێدا خەرج کردووە.

٧ هەڵە ستراتیژییەکەی سوپای پاسداران بەپێی شیکاریی ناوەندی Hudson، حەوت هەڵەی سەرەکی بوونەتە هۆی لاوازبوونی پێگەی ئێران:

1. گەرووی هورمز: فشارەکان بۆ سەر هورمز نەیانتوانی واشنتۆن پاشەکشە پێ بکەن، چونکە تڕەمپ جەختی کردەوە پاراستنی وزە بەرپرسیارێتییەکی نێودەوڵەتییە نەک تەنها ئەرکی ئەمریکا.

2. خوێندنەوەی هەڵە بۆ کات: تاران پشتی بە ستراتیژیی "جەنگی درێژخایەن" بەستبوو، بەڵام خێرایی هێرشەکان ئەم پلانەی تێکشکاند.

3. ڕیتمی گرژییەکان: سوپای پاسداران وای دەزانی کۆنترۆڵی ئاستی گرژییەکانی لایە، بەڵام تڕەمپ بژاردەکانی فرەوانتر کرد و دەرفەتی خۆڕێکخستنەوەی لێ بڕین.

4. گرەوکردن لەسەر "شەقامی عەرەبی": ئێران شکستی هێنا لەوەی گەلانی عەرەب دژ بە هێرشە هاوبەشەکانی ئەمریکا و ئیسرائیل بێنێتە سەر شەقام.

5. جەنگی زانیاری و پڕوپاگەندە: سوپای پاسداران دەیەوێت بە چیڕۆکی وەهمی سەرکەوتن لە مەیدانی ڕاگەیاندن بەدەستبهێنێت، بەڵام ئەمە لەگەڵ واقعە تاڵەکەی ناوخۆی ئێران و داڕمانی ئابووریی وڵاتەکەدا نایەتەوە.

6. گرەوکردن لەسەر چین: پەکین هەڵوێستێکی زۆر وریای وەرگرتووە و ئامادە نییە بەرژەوەندییە ئابوورییەکانی لەگەڵ واشنتۆن بخاتە مەترسییەوە بۆ ڕزگارکردنی سیستمە سەربازییە لەرزۆکەکەی ئێران.

7. داڕمانی تۆڕی بریکارەکان: هێرشە هاوبەشەکان بوونەتە هۆی پارچەپارچەکردنی "قووڵایی ستراتیژی" ئێران، لە حزبولڵای لوبنانەوە تا دەگاتە سووریا و حوسییەکانی یەمەن.

کۆتایی یارییەکە، ناوەندی Hudson جەخت دەکاتەوە کە سوپای پاسداران ئێستا تەنها دوو بژاردەی لەبەردەمدایە: یان ملکەچبوون بۆ مەرجە نێودەوڵەتییە نوێیەکان، یان ڕووبەڕووبوونەوەی مەترسیی داڕمانی دامەزراوەیی، دوای ئەوەی هەموو ئامرازەکانی هێزی لێ سەندراوەتەوە.