هەرێم نیوز
وتەبێژی وەزارەتی پەروەردە، رایگەیاند، شاندی دانوستانی حكوومەتی فیدراڵ، ڕایگەیاندووە بەربەستی یاسایی بۆ گواستنەوەی مامۆستایانی خوێندنی کوردی لە کەرکووک و ناوچە کوردستانیەکان بۆ سەر میلاكیان هەیە.
ئەمڕۆ سێشەممە 10/3/2025، سامان سیوەیلی، وتەبێژی وەزارەتی پەروەردەی حكوومەتی هەرێمی كوردستان، لە ڕاگەیەندراوێکدا بڵاویکردەوە، وەزارەتمان بەمەبەستی گواستنەوەی مامۆستایانی خوێندنی کوردی لە کەرکوک و ناوچە کودستانیەکانی دەرەوەی ئیدارەی هەرێم بۆ سەر میلاکی وەزارەتی پەروەردەی فیدراڵ ، چەند جارێک سەردان و کۆبوونەوەی ئەنجامداوە لەگەڵ وەزارەتی پەروەردە و دارایی عێراقی فیدراڵ ، کە داواکاری گواستنەوەی ئەو مامۆستایانەمان پێشکەشکردوە و پێداگیر بووین کە مافی داراییان زامن بکرێت و پرۆسەی گواستنەوەیان بۆ ئەنجام بدرێت.
دەشڵێت، بەڵام شاندی حکومەتی عێراقی فیدراڵ لە وەزارەتی پەروەردە و وەزارەتی دارایی پێیان راگەیاندین کە رێگری یاسایی هەیە بە گوێرەی ماددەی ٧٧ ی یاسای بودجەی عێراقی فیدراڵ ناتوانن ئەو کارە ئەنجام بدەن ، لەم بارەیەشەوە ئەم ڕێگرییە یاساییەیان لە کۆنوسدا واژۆکردوە و ئاراستەی بەرێز سەرۆکوەزیرانی عێراقی فیدراڵ کراوە.