هەرێم نیوز
نێچیرڤان بارزانی سه‌رۆكی هه‌رێمی كوردستان له‌دیدارێكدا له‌گه‌ڵ وه‌زیری ده‌ره‌وه‌ی سوریا رایگه‌یاند، پێویسته مافه‌كانی گه‌لی كورد و ته‌واوی پێكهاته‌كان له سوریا بپارێزرێن له‌پێناو به‌دیهێنانی ئاشتی و سه‌قامگیری ئه‌و وڵاته‌دا.
سەرۆکایەتیی هەرێمی کوردستان لە راگەیێندراوێکدا دەڵێت: "لە کۆبوونەوەکەدا پێشهاتە سیاسی و ئەمنییەکانی سووریا و عێراق و چۆنیەتیی بەهێزکردنی سەقامگیریی هەرێمایەتییان تاوتوێ کرد، هەروەها باسیان لە دۆخی پێکهاتەکانی سووریا و گرنگیی پاراستنی مافەکانیان و دەستەبەرکردنی بەشدارییان لە داهاتووی وڵاتدا کرد."
بەگوێرەی راگەیێندراوەکە، "سەرۆک نێچیرڤان بارزانی جەختی لەسەر پاراستنی مافه‌کانی گه‌لی کورد و ته‌واوی پێکهاته‌کان له سووریا و گرنگیی بەدیهێنانی ئاشتی و سەقامگیری کردەوە، هەروەها ئاماژەی بە پێویستیی چارەسەرکردنی کێشەکان به دیالۆگ و لێکگەیشتن و کارکردن بۆ داهاتوویەکی سەقامگیر بۆ هەموو پێکهاتەکانی سووریا کرد."
لاى خۆیەوە، شەیبانی پابەندیی سووریای بۆ بەدیهێنانی سەقامگیری و رەخساندنی بارودۆخی گونجاو بۆ دیالۆگی نیشتمانی دووپات کردەوە، هەروەها جەختی لەسەر خواستی سووریا بۆ بەهێزکردنی پەیوەندییەکانی لەگەڵ عێراق و هەرێمی کوردستان و پتەوکردنی هاوکاریی هاوبەش بۆ ڕووبەڕووبوونەوەی ئاستەنگە هەنووکەییەکان کردەوە.
دۆخی هەرێمایەتی و ئاڵنگارييه هاوبەشەکان، لەگەڵ چۆنیەتیی هاوکاریی داهاتوو بۆ بەدیهێنانی سەقامگیری و ئاشتی لە ناوچەکەدا، تەوەرێکی دیکەی کۆبوونەوەکە بوو.